"Pikë e zezë", Rama: Gjobë, bizneseve që s'aplikojnë për pagën e punonjësve
"Askush nuk do të mbetet pa marrë pagën"
Qeveria "Rama" do të gjobisë çdo biznes që nuk ka aplikuar tek Tatimet për punonjësit e larguar nga puna në këtë subjekt tregtar. Kryeministri Edi Rama paralajmëroi se nga dita e djeshme do të miratohet një gjobë për të gjitha bizneset e mëdha, që nuk aplikojnë te Tatimet për punëdhënësit e tyre, në mënyrë që këta të fundit të përfitojnë pagën 40 mijë lekë. Kryeministri Edi Rama, duke i garantuar të gjithë punonjësit, pjesë e përfituesve të paketës së zgjeruar të ndihmës për koronavirusin se nuk do të mbetet asnjë pa e marrë pagën e luftës, ka paralajmëruar ashpër bizneset. Rama shton se vijon puna me shpërndarjen e parave për të gjithë ata që trajtohen me ndihmë ekonomike, si dhe të këstit të dytë i pagës së luftës. Kryeministri Edi Rama me anë të një statusi në "Facebook" bëri publike shqetësimet e punonjësve që nuk kanë marrë pagën prej 40 mijë lekësh për shkak se punëdhënësi i tyre nuk ka aplikuar te Tatimet. "Në mënyrë të përsëritur, individë që përfitojnë nga paketa e zgjeruar më shkruajnë në ' Whatsap', drejtohen këtu ( ku u lutem të jenë konkretë e të lënë të dhëna të sakta për biznesin ku kanë punuar, jo komente të përgjithshme), në Ministrinë e Financave ose te Drejtoria e Përgjithshme e Tatimeve, e me plot të drejtë ankohen se punëdhënësit e tyre ( disa subjekte në kategorinë biznes i madh), nuk aplikojnë për ta dhe kësisoj ata nuk po e marrin dot ende pagesën 40 mijë lekë! Bëhet fjalë për punonjës të larguar nga puna deri në datën 10 prill, të cilëve një numër jo i madh po as i vogël punëdhënësish, u kanë kthyer kurrizin!", - deklaroi z. Rama. Kjo sipas tij është e patolerueshme. "Bëhet fjalë për punonjës të larguar nga puna deri në datën 10 prill, të cilëve një numër jo i madh, por as i vogël punëdhënësish u kanë kthyer kurrizin! Ne do të miratojmë një gjobë kuptimplotë për subjektet e biznesit të madh, që tradhtojnë me këtë papërgjegjshmëri të plotë sociale punonjësit e tyre, duke mos marrë mundimin të bëjnë as një aplikim 3 minuta në emër të kompanisë për ta. Le të provojnë të mos e bëjnë urgjent dhe e shohim sa mirë do u dalë kjo papërgjegjshmëri sociale", u shpreh kryeministri. Edhe pse pritet të nisë lëvrimi i këstit të dytë të pagës së luftës, ka edhe raste që ende nuk kanë marrë pagën e parë. "Pikë e zezë! T'u mohosh punonjësve të tu një pagesë që s'ua jep ti, por shteti! Le të provojnë të mos e bëjnë urgjent dhe e shohim sa mirë do u dalë kjo papërgjegjshmëri sociale! Këtë javë nis lëvrimi i këstit të dytë të pagës së luftës, si edhe ndihmës ekonomike dyfish. Po vijojmë të asistojmë rreth 3 mijë individë që nuk kanë aplikuar për pagën e luftës, si edhe një numër individësh të tjerë, të cilëve u është miratuar, por ende jo lëvruar paga për shkak të pasaktësisë në aplikime, ku nuk kanë njoftuar kodet e duhura bankare. Asnjë nuk do të mbetet pa marrë atë që i takon me ligj e me zakon", - theksoi z. Rama. Sipas aktit normativ të qeverisë, punonjësit e biznesit të vogël do të marrin 3 paga lufte, ndërkohë që gjendja e fatkeqësisë natyrore përfundon në 23 qershor.
PAGESA
"Pikë e zezë! T'u mohosh punonjësve të tu një pagesë që s'ua jep ti, por shteti! Le të provojnë të mos e bëjnë urgjent dhe e shohim sa mirë do u dalë kjo papërgjegjshmëri sociale! Po vijojmë të asistojmë rreth 3 mijë individë që nuk kanë aplikuar për pagën e luftës, si edhe një numër individësh të tjerë, të cilëve u është miratuar, por ende jo lëvruar paga për shkak të pasaktësisë në aplikime, ku nuk kanë njoftuar kodet e duhura bankare", - tha z. Rama.