ATP nis procedurat për kompensimin e 300 pronarëve

Tokat e zëna nga ndërtimet pa leje, dorëzimi i 6 dokumenteve në 11 maj Lista me përfituesit në 12 qarqe të vendit

Pronarët që u është zënë toka nga ndër timet pa leje duhet të dorëzojnë gjashtë dokumente pranë Agjencisë së Trajtimit të Pronave për të marrë kompensimin. Dokumentet do të pranohen nga 11 maji. Bëhet fjalë për pronarë, të cilëve me Vendim të Këshillit të Ministrave u është miratuar e drejta për kompensim si dhe shuma përkatëse. Përmes një njoftimi për mediat, Agjencia e Trajtimit të Pronave bën të ditur fillimin e procesit të pranimit të kërkesave për kompensimin e pronarëve të pasurive të paluajtshme, që preken nga ndërtimet informale, gjeneralitetet dhe të dhënat e të cilëve janë sipas VKM- së nr. 326, datë 22.04.2020. Procesi i pranimit të kërkesave të subjekteve përfituesve do të fillojë në datën 11.05.2020 dhe nuk do të jetë i kushtëzuar dhe i kufizuar në kohë. "ATP- ja fton të gjithë subjektet e interesuara të paraqiten pranë zyrave të saj, në adresën: Rruga ' Muhamet Gjollesha', nr. 54, Tiranë, çdo ditë nga e hëna në të premte, për plotësimin e kërkesës për kompensim dhe dorëzimin e dokumenteve përkatëse", - thuhet në njoftim.

DOKUMENTET

Subjekti kërkues ( subjekti përfitues/ trashëgimtari ligjor/ përfaqësuesi me prokurë), në momentin e plotësimit të kërkesës për kompensim, duhet të paraqesë kërkesën për kompensimin e pronës, sipas formatit tip, që i vihet në dispozicion nga ATP- ja dhe dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil. Një dokument tjetër është prokura e posaçme, e nënshkruar nga të gjitha subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare në emër të tyre. ( Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre paraqesin kërkesë individuale apo të përbashkët për pjesën takuese në pronën që kompensohet. Në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2 000 lekë, pavarësisht se i përket të njëjtës pasuri të paluajtshme. Pronari duhet të paraqesë vërtetimin origjinal të lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare ( IBAN), ku do të transferohet vlera financiare e përfituar dhe fotokopjen e dokumentit të identifikimit. Gjithashtu, përfituesi duhet të paraqesë në ATP mandat pagesën, që vërteton pagimin e tarifës së shërbimit në vlerën 2 000 lekë. Subjektet përfituese, kërkesa e të cilave nuk është pranuar për mungesë dokumentacioni gjatë procedurave të mëparshme kanë të drejtë të riaplikojnë. Këto subjekte nuk paguajnë tarifë shërbimi, nëse provojnë pagimin e saj gjatë aplikimit të mëparshëm.