Raporti i “Freedom House”, Meta: Kambanë e fortë alarmi, meriton reflektim
“Koha për një ringritje dhe trajektore të re të demokracisë”
Kreu i shtetit Ilir Meta shprehu dje shqetë simin për konkluzionet e Organizatës Freedom House, e cila për Shqipërinë doli në përfundimin se shënoi rënie në qeverisjen demokratike dhe procesin zgjedhor. Përmes një postimi në Facebook, kreu i shtetit shprehu shqetësim për konkluzionet e këtij raporti. Sipas tij, është koha për një ringritje të menjëhershme dhe për një trajektore të re të demokracisë, shtetit ligjor dhe respektimit të të drejtave të njeriut. “Thellësisht i shqetësuar nga konkluzionet e raportit të organizatës Freedom House. Përkeqësimi i treguesve për nivelin e demokracisë, rënia ne qeverisje dhe proces zgjedhor kërkon një reflektim dhe përgjigje nga të gjithë. Konkluzioni në raport se: “Nga Tirana në Tbilisi, ata që janë në pushtet, nuk janë të interesuar që ta bëjnë parlamentin një vend ku diskutohet” është një kambanë e fortë alarmi. Është koha për një ringritje të menjëhershme dhe për një trajektore të re të demokracisë, shtetit ligjor dhe respektimit të të drejtave të njeriut, me qëllim përmbushjen sa më parë të kushteve të vendosura nga Bashkimi Europian, me qëllim integrimin e plotë të vendit pa zvarritje të mëtejshme”, - shprehet z. Meta.
REAGIMI
Kryeministri Edi Rama reagoi për raportin e fundit të Freedom House për “Vendet në trazicion”, sipas të cilit Shqipëria ka shënuar rënie në qeverisjen demokratike, duke mbetur edhe këtë vit në kategorinë e regjimeve hibride dhe demokracive në tranzicion. Për shefin e qeverisë këtij raporti nuk po i bëhet leximi i dur dhe e bardha po bëhet e zezë. Ai shprehet se raporti e rendit Shqipërinë vendin me indeksin më pozitiv të lirive demokratike në Ballkanin Perëndimor. Pas saj vjen Serbia, Maqedonia e Veriut, Mali i Zi, Kosova dhe në fund Bosnje Hercegovina që ka mbetur në stanjacion. Rama pranon që kemi rënë me një pikë nga viti i kaluar por thotë se dhe mund të kishim rënë edhe më shumë nëse klima e zjarrtë politike do të kishte djegur largqoftë vendin, siç ishte plani i dështuar i trazirave të vjetshme, të cilat u projektuan për t’i vënë zjarrin Shqipërisë dhe dogjën opozitën. “Kur e bardha bëhet e zezë dhe s’ka asgjë në mes, mbetet vetëm një “merr e jep” shterpë mbi lirinë e medias, që ka pa diskutim të gjithë lirinë e të drejtat të thotë ç’i vjen për mbarë dhe ankohet gjithnjë për mungesë lirie, sa herë të tjerët, përfshirë edhe mua, ushtrojnë të drejtën e tyre të kundërshtimit ndaj të pavërtetave apo gjysmë të vërtetave të saj, të cilat janë edhe gënjeshtrat më të mëdha! Sot një gazetar i dëshpëruar për Shqipërinë që paskej rënë teposhtë, e fundit në Ballkan sipas tij, në Raportin e Freedom House për lirinë, donte të dinte sa më vriste mua ndërgjegjja për këtë lajm të zi! Mirëpo ja çfarë del, në fakt, nga raporti që mat lirinë demokratike në 195 shtete të botës qysh prej vitit 1973: Shqipëria është vendi me indeksin më pozitiv të lirive demokratike në Ballkanin Perëndimor. Në krahasim me një vit më parë, Shqipëria ka një indeks të lirisë demokratike prej 67 pikësh. Serbia, vendi i dytë në klasifikimin rajonal, ka shënuar një regres të lehtë duke kaluar nga 67 në 66, një pikë poshtë Shqipërisë. Maqedonia e Veriut renditet e treta, me 63 pikë, ndërsa Mali i Zi ka pësuar rënien më të madhe në rajon, duke zbritur në 62 pikë nga 65 që kishte
vitin e shkuar. Kosova mbetet e parafundit në listë, por me një progres prej dy pikësh ( 56 pikë nga 54 të vitit të kaluar), ndërsa Bosnja është në një stanjacion të plotë, duke qëndruar në vendnumëro, e fundit për sa i përket lirive demokratike në rajon. Në 2013- n, Serbia dhe Mali i Zi konsideroheshin vende të lira dhe jo pjesërisht të lira si tani, ndërsa Shqipëria me
Bosnje Hercegovinën ishin vendet me renditjen më të ulët në rajon. Po, e vërtetë, kemi rënë me një pikë krahasuar me vjet dhe mund të kishim rënë edhe më shumë nëse klima e zjarrtë politike do të kishte djegur largqoftë vendin, siç ishte plani i dështuar i trazirave të vjetshme, të cilat u projektuan për t’i vënë zjarrin Shqipërisë dhe dogjën opozitën”, - theksoi z. Rama.