PS: "Zgjedhoren" e kalojmë edhe pa opozitën. PD: Po shkelni marrëveshjen
Opozita, letër Gjiknurit dhe Hajdarit: Komisioni të mblidhet edhe të dielën "Mazhoranca synon krijimin e ngërçeve politike"
Komisioni Parlamentar i Reformës Zgjedhore zhvilloi dje një mbledhje online ku pjesë u bënë dhe përfaqësuesit e disa ambasadave, OSBE/ ODIHRit dhe delegacionit të BE. Më shumë se për çështjet konkrete, në këtë takim, siç pohoi bashkëdrejtuesi socialist Damian Gjiknuri, u bë analizë e çështjeve të dakordësuara më herët. Por për opozitën jashtë parlamentit, kjo mbledhje është nul. Damian Gjiknuri dhe Rudina Hajdari prezantuan online para Komisionit të Reformës Zgjedhore punën e bërë deri më tani në Këshillin Politik. Administrata zgjedhore dhe kolegji zgjedhor janë dy çështjet për të cilat Këshilli Politik dhe grupi i ekspertëve teknikë nuk kanë mundur të finalizojnë punën për amendime në Kodin Zgjedhor.
PARALAJMËRIMI
Socialisti Damian Gjiknuri apeloi se demokratët duhet të jenë pjesë e Këshillit Politik, pasi ka ende pika që duhen diskutuar për të pasur një reformë konsensuale. Gjiknuri deklaron se mazhoranca është e gatshme ta kalojnë dhe të vetëm reformën, që është kusht për çeljen e negociatave dhe kujton kartonët jeshilë që kanë në dispozicion në Kuvend. "Kam bërë kontaktet e mia informale, kam folur dhe me përfaqësues të diplomacisë së huaj për të nxitur dialogun. Nuk kam marrë përgjigje definitive. Disa deklarata të djeshme nuk i kuptova mire dhe i mbetet "Janë disa, si administrata zgjedhore. Kemi mundësi të gjejmë kompromis aty. Çështja e Kolegjit Zgjedhor, meqenëse është i përkohshëm, të zgjedhim gjyqtarët që kanë kaluar vetingun. Edhe këtu kemi divergjenca. Pjesa tjetër e gjërave kryesisht janë adresuar, kemi rënë dakord për përdorimin e teknologjisë, votën e emigrantëve", - deklaroi z. Gjiknuri.
LETRA
Përfaqësuesit e Opozitës në Këshillin Politik Oerd Bylykbashi dhe Petrit Vasili kërkojnë mbledhjen sa më parë të Këshillit Politik. Ata i dërguan dje një letër pjesës parlamentare të Këshillit, Damian Gjiknurit dhe Rudina Hajdarit, ku shprehet kërkesa për mbledhjen e komisionit edhe të dielën, në mënyrë që të vijohet sa më shpejt me reformën zgjedhore. "Opozita ka qenë dhe mbetet e angazhuar për përmbushjen e këtij kushti për hapjen e negociatave me BE dhe për t'i siguruar qytetarëve shqiptarë mundësinë për zgjedhje të lira dhe të ndershme. Ky ka qenë angazhimi ynë i përditshëm, duke i vlerësuar zgjedhjet e lira dhe të ndershme si themelin e demokracisë, dhe procesin e integrimit europian si prioritet kombëtar", - shprehen përfaqësuesit e opozitës. Në letër theksohet se debati i hapur në media nga ana e përfaqësuesve parlamentarë për pjesëmarrjen apo jo të opozitës në Këshill, nuk ka asnjë bazë të vërtete. "Nga momenti i ndërprerjes së mbledhjeve për shkak të pandemisë, nuk ka pasur asnjë kërkesë apo ftesë për rinisjen e punës nga ana juaj."- thuhet në letër, ku nuk mirëpriten qëndrimet e përfaqësuesve parlamentarë në lidhje me reformën zgjedhore. "Deklaratat nga ana juaj për një reformë jokonsensuale dhe të njëanshme synojnë krijimin e ngërçeve politike artificiale që dëmtojnë konsensualitetin e Reformës Zgjedhore dhe janë shpenzim energjish i kotë në dëm të përmbushjes së një prej kushteve të vendosura nga BE për hapjen e negociatave për anëtarësim", - thuhet në letër. Duke vënë në dukje se bllokimi i punës për Reformën Zgjedhore është një sjellje e hershme e qeverisë, opozita vazhdon të këmbëngulë për bashkëpunim të vërtetë mes palëve për çështjet e reformës që sigurojnë zgjedhje të lira e të ndershme. "Pavarësisht mungesës së përgjigjes nga ana juaj për propozimet tona, ne mbetemi të angazhuar, jo për fjalë apo debate pa vlerë, por për përmbylljen sa më parë të Reformës Zgjedhore, duke siguruar implementimin e Rekomandimeve të OSBE/ ODIHR për standardet demokratike të zgjedhjeve", citohet në letrën e opozitës. Rendi i ditës për mbledhjen e kërkuar nga opozita të dielën ose të hënën përmban 3 pika: 1. Riskedulimin e kalendarit të punës së Këshillit Politik, duke synuar përmbylljen e punës brenda datës 31 maj 2020. 2. Vlerësimin e përfaqësuesve të maxhorancës mbi propozimet e deritanishme të opozitës të bëra në mbledhjet paraardhëse të Këshillit Politik. 3. Çështje të tjera të propozuara nga anëtarët e tjerë të Këshillit Politik.