COVID- 19/ 12 raste të reja, harta e shpërndarjes zgjerohet në Fier e Shkodër
Zv. ministrja e Shëndetësisë: 832 të prekur në total, 595 janë shëruar plotësisht "Spitali COVID 2 nuk do të mbyllet, rrezik shtimi i infeksionit"
Numri i të prekurve nga koronavirusi ka pësuar ulje krahasuar me një ditë më parë, duke regjistruar 12 pacientë pozitivë të konfirmuar brenda 24 orësh. Por harta e shpërndarjes është zgjeruar edhe në Shkodër e Fier. Në komunikimin e përditshëm për mediat, zv. ministrja e Shëndetësisë, Mira Rakacolli ka sqaruar situatën epidemiologjike në vend. "Në lidhje me situatën e COVID19 ju bëjmë me dije së gjatë 24 orëve të fundit janë evidentuar 12 raste të reja pozitive nga testimi i 255 personave të dyshuar si bartës të këtij infeksioni ose të sëmurë. Pjesa më e madhe e tyre janë kontakte të rasteve të konfirmuara më parë dhe të gjetura nga hetimi epidemiologjik. Rastet pozitive të ditës së sotme janë të shpërndara si vijon: Në Fier 3 të prekur, 3 në Krujë, 3 në Kamëz, 2 në Shkodër dhe 1 rast në Tiranë",- tha Rakacolli në fjalën e saj. Sakaq, numri total i të prekurve që prej 9 marsit, ka arritur në 832, e fatmirësisht 595 prej tyre janë shëruar plotësisht.
PACIENTË AKTIVË
Deri më tani, 595 persona janë shëruar nga COVID- 19 në vendin tonë, ndërkohë që vazhdojnë të jenë aktivë 206 persona. Në dy spitalet COVID, në spitalin infektiv dhe spitalin "Shefqet Ndroqi", aktualisht janë të shtruar 36 pacientë dhe vetëm 8 prej tyre janë në terapi intensive. Pjesa tjetër po ndiqen nga mjeku i familjes ose janë asimptomatikë. "Situata epidemiologjike e infeksionit Sars Cov 2 dhe sëmundjen COVID- 19 në Shqipëri, po monitorohet me shumë kujdes nga të gjitha strukturat shëndetësore. Veçanërisht në këtë situatë të lehtësimit të masave, është rritur vigjilenca për gjurmimin, testimin dhe identifikimin në kohë të rasteve të dyshuara me COVID- 19 si dhe kontakteve të tyre, në mënyrë që situata të vazhdojë të mbahet në kontroll",bëri me dije zv. ministrja e Shëndetësisë. Kjo e fundit është shprehur se COVID- 2 "Shefqet Ndroqi" nuk do të mbyllet për t'iu rikthyer pacientëve, që vuajnë nga sëmundje pulmonare. Ajo shtoi se me hapjen e masave, vendi është në një moment tejet delikat dhe ekziston mundësia që infeksioni të shtohet sërish. "Epidemia është kontrolluar shumë mire, edhe në sajë të masave të mëdha shtrënguese që u morën që në fillim. Tashmë me hapjen e masave jemi në një moment tejet delikat, të cilin po e monitorojmë me shumë kujdes dhe ekziston mundësia që përsëri infeksioni të shtohet. Për këtë arsye këtë problem ne do ta shqyrtojmë në dritën e kësaj dinamike",theksoi Rakacolli.
THIRRJA PËR QYTETARËT
Ministria e Shëndetësisë dhe Mbrojtjes Sociale apeloi për qytetarët që të vazhdojnë të respektojnë masat e rekomanduara nga autoritetet shëndetësore sidomos distancimi fizik si një nga mjetet më efikase të parandalimit të infeksionit. Po ashtu theksoi se bizneset e hapura duhet të respektojnë me rigorozitet protokollet e sigurisë, në mbrojtje të shëndetit publik dhe të parandalimit të shtimit të infeksionit. "Ftojmë qytetarët të mos neglizhojnë shenjat e COVID- 19 dhe të telefonojnë menjëherë urgjencën kombëtare 127 në rast se kanë dyshime se janë të prekur nga ky virus. Për të kontaktuar mjekun e familjes, për pyetje në lidhje me COVID19, për këshillim psikologjik në rast të shfaqjes së shenjave të ankthit apo shqetësime të tjera, ju lutemi, telefononi në linjën e gjelbër 0800 4040",- bën me dije MSHMS.