Kriza, Rama: Hapje dhe lehtësime. Basha: Qeveria e keqmenaxhoi krizën e pandemisë
“Po shkatërrohet çdo sektor, mijëra shqiptarë do të hiqen nga puna”
Kryeministri Edi Rama njoftoi një tjetër masë lehtësuese duke nisur nga dita e djeshme, për të vijuar me datën 18 maj. Bëhet fjalë për autoshkollat, që zhvillojnë kurset e patentave apo edhe provimet, të cilat kanë mbetur përgjysmë, për shkak të situatës së shkaktuar nga COVID- 19. Kreu i qeverisë theksoi se hapja do të bëhet përmes dy fazave, duke u pasuar me disa rregulla që duhen respektuar. Me një shënim në faqen e tij, në “Facebook”, Rama shkruan se do të rinisë aktiviteti i autoshkollave, apo kurseve që përgatisin aplikantët për lejë drejtimi të automjeteve. Sipas tij, nisja bëhet në dy faza, në 11 maj, pra dje nisën regjistrimet dhe në datën 18 maj do të nisë praktika në rrugë, por sipas rregullave të përcaktuara. Po dje, kryeministri Edi Rama në rrjetin social “Facebook” sqaroi procesin e aplikimeve për kartë ID dhe pasaportë. Tashmë kryeministri njofton se karta e ID dhe pasaporta mund të merren duke aplikuar “online” në “e- Albania” dhe se në këtë mënyrë shmanget humbja e kohës në sportele. “Sqarim për shumë komente mbi aplikimet për kartë ID apo pasaportë. Procesi është lehtësuar ndjeshëm dhe koha është përgjysmuar me heqjen e sportelit dhe radhës në komisariat. Karta ID apo pasaporta biometrike tanimë merren duke aplikuar ‘ online’ në ‘ eAlbania’. Pasi merr aplikimin, Policia e Shtetit ka një afat deri në 8 ditë për verifikimet me procedurë normale dhe vetëm 24 orë për verifikimet me procedurë të përshpejtuar. Pas kryerjes së verifikimeve, qytetari njoftohet me ‘ email’ për të marrë orarin e paraqitjes fizike për dhënien e gjurmëve biometrike në zyrën përkatëse të kompanisë ‘ Aleat’. Procesi kryhet sipas orarit të dhënë ‘ online’ dhe në kushte sigurie të plotë antiCOVID- 19", - shprehet z. Rama.
AKUZAT
Lideri i opozitës, Lulzim Basha, denoncoi dje se pandemia ekonomike po shkatërron çdo sektor të ekonomisë, duke rritur ndjeshëm varfërinë dhe papunësinë. Lulzim Basha priti në një takim përfaqësues të Shoqatës së Bashkimit të Prodhuesve Shqiptarë. Sipas njoftimit të shpërndarë nga Partia Demokratike, në këtë takim përfaqësuesit e prodhuesve ngritën shqetësime për mungesën e mbështetjes nga ana e qeverisë për përballimin e krizës së shkaktuar nga pandemia e COVID- 19. “Ndonëse kërkesat e tyre konkrete për të përballuar krizën e këtij sektori gjatë pandemisë janë bërë publike qysh herët, qeveria nuk ka marrë asnjë masë konkrete për t’u ardhur në ndihmë. Paketat ekonomike të qeverisë nuk e kanë ndihmuar aspak këtë sektor, që çdo ditë e më shumë po varfërohet dhe rrënohet nga pandemia e krizës ekonomike. Mungesa e likuiditetit në zinxhirin prodhues, shoqëruar edhe me mungesën e aksesit në garancinë sovrane janë faktorë shtesë, që e bëjnë sektorin e prodhimit shqiptar një nga më të rrezikuarit nga falimentimi, për shkak të keqmenaxhimit të ekonomisë gjatë periudhës së pandemisë”, thuhet në njoftimin e shpërndarë nga PD- ja. Nga ana e tij, Basha përsëriti qëndrimin e opozitës se qeveria e keqmenaxhoi krizën e shkaktuar nga pandemia në dëm të shqiptarëve dhe në favor të miqve të saj. “41.5 milionë euro ka dhënë Edi Rama për 3 milionë shqiptarë, ku janë qindra e mijëra të papunë dhe biznese gati për t’u mbyllur, ndërkohë që po kaq u ka dhënë qeveria klientëve të saj për 2 km rrugë tek Unaza e Re”, deklaroi Basha. Ai i konsideroi të drejta, shqetësimet e ngritura nga Shoqata e Bashkimit të Prodhuesve Shqiptarë dhe i siguroi ata se PD- ja do të jetë në krah të biznesit duke mbështetur kërkesat e tyre legjitime, si rruga e vetme për të shmangur katastrofën ekonomike dhe humbjen e dhjetëra- mijëra vendeve pune.