“S’ka qeveri tranzitore”, Rama: S’bëhet shtet duke grisur kontratën me votuesit
“Koalicion me LSI- në? E përjashtoj, partia e presidentit u degradua” “Kanabisi, tani u poqën kushtet, është trend botëror”
REAGIMI I LSI
Nënkryetari i LSI, Petrit Vasili e ka mohuar dje mundësinë e koalicionit me PS. “LSI me Edi Ramën? Kurrë! Limoni i shtrydhur të njëjtin fund ka pasur gjithmonë. Edi Rama e humbi edhe kohën për të ikur...!”, shkruajti Petrit Vasili në “Facebook”.
Kryeministri Edi Rama përjashton çdo mundë si për krijimin e një qeverie tranzitore, siç kërkon opozita. Në një bashkëbisedim me gazetarët, Rama bëri dje të ditur se me reformën zgjedhore do të garantohen zgjedhje të lira. Po ashtu, ai deklaroi se me anë të ndryshimeve do të garantohet që në kolegjet zgjedhore të mos jenë më anëtarë gjyqtarë që nuk e kanë kaluar vetingun. “Shteti nuk bëhet duke sakrifikuar parimet themelore dhe duke grisur kontratën me qytetarët që votojnë. Kaq e thjeshtë është kjo. Opozita mund ta kërkojë, është në të drejtën e saj. E kërkoi në forma krejt vulgare, duke përgatitur një zjarrvënie të përgjithshme, u dogj vetë. Nëse duan ta vazhdojnë ta kërkojnë, janë në të drejtën e tyre, por kjo nuk ka për të ndodhur. Zgjedhjet e lira janë detyrim, Shqipëria ka pasur të tilla, cilësia ka qenë në përmirësim dhe duhet përmirësuar. Këtu nuk bëhet fjalë për të pranuar propozimet e opozitës, por dakordësuar propozimet e OSBE- së, nuk di të ketë një të tillë që të përputhet me çka ju thatë. Dhe përgjegjësia e administratorëve zgjedhorë të jetë qytetare dhe ligjore”, - deklaroi z. Rama.
KOALICIONI
Në konferencën “online” me gazetarët, kryeministri Rama u përgjigj edhe për një mundësi për koalicion me LSInë. Rama tha se nuk sheh asnjë perspektivë për një rikthim në koalicion me partinë e presidentit. “Në politikë kurrë mos thuaj kurrë, por nuk shoh asnjë perspektivë për një rikthim në koalicion me partinë e presidentit, sepse konteksti i sotëm, degradimi i vazhdueshëm i asaj partie dhe detyrimet programore e bindja jonë është e mjaftueshme që të flasë puna. Falë punës, aleanca me popullin e bën krejtësisht të panevojshëm këtë diskutim. Nuk kemi asnjë arsye të bëjmë koalicion”, - tha z. Rama.
KANABISI
Kryeministri Edi Rama shpjegoi dje se përse është zgjedhur tani koha për të diskutuar mbi projektligjin për legalizimin e kultivimit të kanabisit mjekësor. Rama tha se tani janë pjekur kushtet, madje nënvizoi se ambicia e qeverisë është që ky projektligj të miratohet në parlament brenda këtij sesioni. “Tani janë pjekur kushtet; pse tani, po pse jo tani? Kaq e thjeshtë. Se nga vijnë idetë, unë s’jam nga ata që luftoj për ‘ copyright’, kjo nuk është shpikje. Kultivimi i kanabisit është një trend botëror kështu që ‘ copyright’ s’më intereson. Di që jemi në kohën kur duhet ta shtyjmë para dhe brenda këtij sesioni të parlamentit ambicia është që ta kalojmë”, tha Rama. Ai bëri të ditur se për këtë propozim nuk ka pasur negociata me delegacionin e BE- së.
“OLIGARKËT”
Gjatë bashkëbisedimit që pati me gazetarët, kryeministri Edi Rama i ktheu një përgjigje edhe ish- ministrit të Jashtëm, Ditmir Bushatit, për kritikat e këtij të fundit. Ky i fundit tha nga foltorja e Kuvendit se mazhoranca duhet të ndahet nga oligarkët, por Rama mohoi që në Shqipëri të ketë oligarkë. “Në Shqipëri nuk ka oligarkë, mjafton të referohemi te termi dhe të nxjerrim konkluzione. Oligarkë nuk janë ata që janë sipërmarrës të pasur, që përmes biznesit realizojnë të ardhura më shumë se të tjerët. Oligarkët janë ata që influencojnë drejtpërdrejt vendimmarrjet e qeverisë apo të parlamentit dhe diktojnë axhenda të caktuara politike në funksion të interesave të tyre. Nuk kam njohur deri më sot asnjë person që ta ketë këtë pushtet në Shqipëri dhe nuk kemi marrë asnjëherë asnjë vendim që nuk ka qenë i diktuar nga bindjet tona dhe sigurisht nga qasja jonë në raport me interesat e vendit”, - tha z. Rama.
GARANCIA
Kryeministri Edi Rama paralajmëroi se qeveria shumë shpejt do të ketë gati masterplanin e rimëkëmbjes ekonomike. “Jam i shqetësuar për fazën e dytë, hapja sjell me vete një sërë rreziqesh. Virusi është mes nesh dhe do jetë për një kohë të gjatë. Na duhet shumë kujdes. Jemi të përgatitur edhe për mundësinë e një vale të re infektimesh. Shikojmë ecurinë e paketave, paketa e parë është kryer ditë pas dite dhe vazhdon disbursimi i transhit të dytë të pagës së luftës. Mbeten pak të tjerë që duhet të ndihmohen për të plotësuar dokumentacionin me bankat. Paketa e zgjeruar po ashtu ka ecur mirë. 22 milionë euro janë alokuar për bizneset nga garancia sovrane, ka shumë aplikime që po shqyrtohen”, - theksoi kryeministri.
DREJTËSIA
Në konferencën “online” me gazetarët, kryeministri Rama u pyet në lidhje me procesin zgjedhor dhe bashkëpunimin me opozitën. Rama u përgjigj se janë duke u ndjekur rekomandimet e OSBE- ODHIR, ndërsa referuar propozimeve të opozitës, ai shtoi se nuk përputhen me ato të OSBE- ODHIR. “Reforma në drejtësi nuk është një vepër ekskluzive e jona. Është një vepër në proces me bashkautorësinë e partnerëve evropianë dhe SHBA- ve. Nuk e ka dëgjuar nga ata që ka vend për t’u rishikuar deri më sot. Asgjë nuk është e papërmirësueshme. Në këto kushte duhet zbatuar në realitet, pastaj mbrojtësit e flaktë dhe të akullt janë tema të tjera. Përgjigja ime është ‘ jo’, përderisa duhet ta zbatojmë dhe nëse do të ketë vend për ta riparë, do të diskutohet më bashkautorët”, - deklaroi z. Rama.
TEATRI
Kryeministri Edi Rama, ashtu si kryebashkiaku Erion Veliaj nuk tërhiqet nga plani për shembjen e Teatrit Kombëtar dhe ndërtimit të një godine të re në truallin e tij. Në bashkëbisedimin me gazetarët, Rama kur u pyet për këtë çështje dhe paralajmërimin e Presidentit Meta për një padi në Kushtetuese, tha se kushdo ka të drejtë të ketë opinionet e tij, por në fund vendos shumica, që në rastin konkret është mazhoranca dhe PS- ja që kanë vendosur ta shembin. “Është një proces për të cilin jam shprehur. Ajo godinë duhet shembur dhe Shqipëria duhet të ketë një Teatër të ri Kombëtar, të denjë për këtë emër. Mezi pres të shoh Teatrin e ri Kombëtar. Të gjithë kanë të drejtë të kenë opinionet e tyre, por në fund vendos shumica. Ne jemi shumica dhe e kemi marrë këtë vendim. Nuk shoh sesi pakica mund të imponohet në vendimmarrje”, - tha z. Rama.