Ndikimi i COVID- 19, BERZH: Shqipëria, me rënie ekonomike 9%
Përkeqësohet parashikimi për rritjen e ekonomisë shqiptare Turizmi dhe remitancat, dy faktorët përcaktues
Ekonomia shqiptare do të shënojë një rënie me 9 % gjatë vitit 2020. Ky është parashikimi i Bankës Europiane për Rindërtim dhe Zhvillim, Prodhimi i Brendshëm Bruto do të bjerë me 9.0%. Raporti i fundit i bankës parashikon ringritje të shpejtë, por me ndikim afatgjatë politik dhe shoqëror. Shqipëria do të shënojë rënie të Prodhimit të Brendshëm Bruto prej 9.0 për qind në vitin 2020 për shkak të ndikimit në ekonomi të pandemisë së koronavirusit. Ky parashikim bëhet nga Banka Europiane për Rindërtim dhe Zhvillim në raportin e fundit të parashikimit makroekonomik. Nga ana tjetër banka pret që rimëkëmbja të jetë e shpejtë gjatë vitit 2021 me një rritje të Prodhimit të Brendshëm Bruto prej 12.0 për qind.
SHKAQET E RËNIES
Sipas Bankës Europiane për Rindërtim dhe Zhvillim shkak për këtë rënie të madhe të PBB- së është varësia e Shqipërisë nga turizmi dhe të ardhurat e ulëta nga tregtia jashtme. Ndikim në ekonomi do të ketë, gjithashtu, pakësimi i mundshëm i remitancave. "Rimëkëmbja do të varet nga relaksimi gradual i masave kufizuese për frenimin e virusit dhe kthimi në normalitet gjatë gjysmës së dytë të vitit",thekson raporti ku nënvizon se parashikimet ndikohen nga pasiguria e paprecedentë. Kryeekonomistja Beata Javorcik thotë se ndërsa bota del gradualisht nga kjo krizë, bashkëpunimi mbetet kyç për forcimin ekonomik. "Kriza ka qenë një goditje e madhe dhe dalja prej saj mbetet po aq sfiduese. Kjo nuk është koha për t'u angazhuar nacionalizëm dhe proteksionizëm ekonomik, por është koha për të ndërtuar një të ardhme të ndritur nëpërmjet zotimit për tregtinë e lirë, zbutje të ndikimit të ndryshimeve të klimës dhe bashkëpunim ekonomik",- thotë ajo.
PARASHIKIMI
Raporti i Bankës Europiane për Rindërtim dhe Zhvillim thotë se kjo rënie e Prodhimit të Brendshëm Bruto do të ketë ndikim modest në periudhën afatgjatë të veprimtarisë ekonomike, ndërsa rritja do të rikthehet gradualisht në tremujorin e tretë. Kjo goditje do të ketë ndikim afatgjatë politik dhe shoqëror. "Nëse masat e distancimit fizik mbeten në fuqi për një periudhë më të gjatë nga sa është parashikuar, recensioni do të jetë më i thellë,"- shton raporti. Në mbarë rajonin e Ballkanit Perëndimor është ndikuar kërkesa dhe oferta. Goditjet e jashtme do të vijnë si pasojë e rënies së çmimit të lëndëve të para, duke ndikuar kështu eksportet, çrregullime në zinxhirin global të vlerës, kolapsin e turizmit dhe pakësimin e remitancave.
FMN- JA
Fondi Monetar Ndërkombëtar është treguar më optimist në parashikimin e tij. Sipas FMN ekonomia shqiptare pritet që të tkurret me 5% në 2020- n si rrjedhojë e pasojave që ka shkaktuar pandemia e COVID- 19 që ka ndalur pothuajse gjithë aktivitetin ekonomik, më e ulta që prej vitit 1997, ku rënia ishte 10.9%.