I vendosi lëndë plasëse fqinjit në dritare, arrestohet 60- vjeçari Petrit Haxhiu
TIRANË
- Një 60- vjeçar ka përfunduar në pranga, pasi akuzohet se është autori i vendosjes së lëndës plasëse në dritaren e banesës së fqinjit të tij, Blerim Haxhiu. Bëhet fjale për Petrit Haxhiun, i cili akuzohet për “Mbajtja pa leje e armëve dhe municioneve luftarake”, “Kanosja” dhe “Shkatërrimi i pronës”. Sipas burimeve policore, ngjarja ka ndodhur në fshatin Bastar i Mesëm, në njësinë administrative Zall Bastar, Tiranë. Mësohet se 60vjeçari ka qenë në gjendje të dehur në momentin që e ka kryer aktin, madje një natë më parë, dy kushërinjtë kanë qenë bashkë, duke konsumuar alkool. Pas disa gotave, kushërinjtë janë konfliktuar dhe 60- vjeçari i ka shkuar në banesë për t’i vënë tritolin. Policia ka sekuestruar 3 kallëpe me lëndë plasëse, një fitil me detonator dhe 20 metra fitil zjarrpërcjellës. “Specialistët për Hetimin e Krimit në Komisariatin Nr. 4, menjëherë pas ngjarjes së ndodhur në orët e para të mëngjesit të sotëm në fshatin Bastar i Mesëm, ku ishte vendosur një sasi lënde plasëse në banesën e shtetasit B. H., bënë të mundur zbardhjen e ngjarjes, identifikimin dhe kapjen e autorit. Në përfundim të veprimeve u bë arrestimi në flagrancë, për veprat penale “Mbajtja pa leje e armëve dhe municioneve luftarake”, “Kanosja” dhe “Shkatërrimi i pronës”, i shtetasit P. H., 60 vjeç, pasi në fshatin Bastar i Mesëm, Njësia Administrative Zall Bastar, dyshohet se ka vendosur një sasi të vogël lënde plasëse në dritaren e banesës e shtetasit B. H., duke i shkaktuar dëme të lehta materiale”, njoftoi ndër të tjera policia. Ndërsa sqaroi se gjatë kontrollit në banesën e shtetasit të arrestuar, shërbimet e Policisë gjetën dhe sekuestruan në cilësinë e provës materiale 20 metra fitil zjarrpërcjellës, një detonator dhe 3 kallëpe të dyshuara me lëndë plasëse. Materialet i kaluan Prokurorisë, për veprime të mëtejshme, për veprat penale “Mbajtja pa leje e armëve dhe municioneve luftarake”, “Kanosja” dhe “Shkatërrimi i pronës”.