FSHF- ja del duarbosh nga takimi, sot mbledh presidentët e klubeve
Në orën 11: 00 Duka do të takojë krerët e skuadrave të Superiores. Mund të vijë vendimi final Akti i dytë dje, qeveria nuk tërhiqet nga kërkesat e saj
Qeveria nuk tërhiqet, federata kundërpërgjigjet duke mbledhur klubet. Gjithçka në kuadër të takimit të radhës së ditës së djeshme mes shtetit dhe futbolli, ku qeveria kërkoi përmirësim të protokollit sanitar, ndërsa FSHF- ja doli sërish duarbosh, edhe pas takimit të dytë të zhvilluar me përfaqësues të Komitetit Teknik të Ekspertëve. Përfaqësues të federatës edhe gjatë mbledhjes së parë të zhvilluar në Ministrinë e Shëndetësisë kërkuan që data e fiksuar nga ministrja Ogerta Manasterliu për rifillimin e aktiviteteve sportive më 18 maj të rishikohej, pasi ky afat vë në diskutimin rifillimin e garës. Takimi i dytë ka qenë sërish në rrafshin teknik, ku FSHF- ës i është kërkuar përmirësimi i protokollit sanitar në 2- 3 pika, për stërvitjet individuale, kolektive dhe zhvillimi i ndeshjeve. Grupi i eksperteve të FSHF- së do të punojë menjëherë për përmirësimin e këtyre elementeve të kërkuar dhe do të vendosë në dispozicion të Ministrisë së Shëndetësisë protokollin e ri me ndryshimet e bëra. Deri në një takim të tretë, vijon të qëndrojë në fuqi data 18 maj, si data kur ekipet mund të rinisin stërvitjet individuale.
SOT MBLIDHEN PRESIDENTËT
Por, kundërpërgjigja nuk vonoi. Pas takimit të djeshëm me përfaqësues të Komitetit Teknik të Ekspertëve, federata ka përcaktuar një tjetër mbledhje, që do të zhvillohet në zyrat e saj dhe kësaj radhe me presidentët e Kategorisë Superiore. Ky takim i këtij niveli mund të sjellë zhvillime shumë të rëndësishme sa i takon Superligës, ku në jo pak raste kreu i FSHF- së, Duka, por edhe ai i Ligës Profesioniste, Libohova janë shprehur për mbylljen zyrtare të garës, duke parë hendekun që ekziston me qeverinë në lidhje me datën e rifillimit dhe faktit se do ishte e kotë që kampionati të niste pas datës 1 qershor. "Federata Shqiptare e Futbollit do të zhvillojë ditën e nesërme ( sotme) një mbledhje me të gjithë presidentët e Kategorisë Superiore për të diskutuar mbi opsionet e rifillimit të futbollit. Kjo mbledhje vjen pas punës së kryer nga stafi i FSHF- së për përgatitjet mbi rifillimin e garës futbollistike në vend. Ekspertët mjekësorë të federatës kanë përgatitur një protokoll mjekësor, i cili është konsultuar me Ministrinë e Shëndetësisë dhe Mbrojtjes Sociale në dy takimet e zhvilluara ditët e fundit. Në ditët në vazhdim federata do të zhvillojë takime me të gjithë anëtarët e saj", lexohet në njoftimin zyrtar të FSHF- së.