Tapitë për tokat bujqësore, zgjidhet ngërçi i mbivendosjeve
Zbardhet urdhri i Ministrisë së Bujqësisë për dixhtalizimin e pronave Programi i "WEB GIS", krijohet harta për çdo kategori tokë
Ministria e Bujqësisë do të hedhë në një sistem të ndarë sipas zërave kadastralë të gjitha tokat. Në fokus janë tokat bujqësore, të cilat së shpejti do të publikohen në një platformë "online", me qëllim që të shmangen mbivendosjet, paqartësitë apo të eliminohen problematika me pronësitë që kanë ekzistuar deri më tani. Udhëzimi i Ministrisë së Bujqësisë është publikuar në Fletoren Zyrtare dhe parashikon të krijojë programin "WEB GIS" për të dhënat e tokës. Në vendim thuhet se të dhënat që do të integrohen në programin e "WEB GIS" janë: a) harta e tipave të tokës bujqësore, b) harta e përshtatshmërisë së tokës bujqësore, c) të dhënat e tokës në nivel parcele, d) harta e përdorimit/ mbulesës së tokës, e) hartat e rrezikut potencial dhe aktual të erozionit, f) rrjeti rrugor, g) ndërtimet, h) rrjeti ujitës dhe kullues. Ky udhëzim është në kuadër të krijimit të informacionit mbi tokën bujqësore, me qëllim menaxhimin e qëndrueshëm të saj, që i hap rrugë zgjidhjes së problematikës me titujt e pronësisë dhe me pronën në tërësi. Vendi ynë ka një sërë problematikash të pazgjidhura ndër vite sa i takon çështjes së pronësisë, për shkak të parcelizimit, mosndarjes së saktë të tokave dhe mungesës së dokumentacionit, çka ka sjellë edhe konflikte të herëpashershme, si dhe nuk u ka dhënë mundësi individëve t'i shesin apo tjetërsojnë ato.
TOKAT BUJQËSORE
Tokat do të trajtohen me ligjin Nr. 20/ 2020, për përfundimin e proceseve kalimtare të pronësisë në Republikën e Shqipërisë, i cili tashmë ka hyrë në fuqi. Sipas këtij ligji, gjatë procedurave të regjistrimit ose përmirësimit të regjistrit të pasurive të paluajtshme, ASHK- ja plotëson me elementet hartografike AMTP- të që nuk janë të shoqëruara me dokumentacion hartografik, ose saktëson dokumentin hartografik. ASHK- ja verifikon nëse të gjithë përfituesit e tokës bujqësore në territorin e ish- kooperativës dhe/ ose ish- ndërmarrjes bujqësore kanë në posedim aq sipërfaqe sa është parashikuar në AMTP. Nëse ka subjekte që posedojnë më pak dhe të tjerë më shumë sesa në AMTP, Agjencia përcakton ose korrigjon kufijtë e sipërfaqeve, sipas sasisë së AMTP- ve dhe i pasqyron ato në hartën kadastrale. ASHK- ja i ofron subjektit që posedon më pak se sipërfaqja e përcaktuar në AMTP, mundësinë për t'u plotësuar me këto sipërfaqe, deri në sasinë e përcaktuar në AMTP, në rastet kur korrigjimi, sipas kësaj pike, nuk mund të realizohet dhe në territorin e ish- kooperativës dhe/ ose ish- ndërmarrjes bujqësore ka sipërfaqe të lira shtetërore. Refuzimi i regjistrimit nuk sjell efekte për vlefshmërinë ose jo të aktit të pronësisë së refuzuar. Pala së cilës i është refuzuar plotësisht apo pjesërisht regjistrimi ka të drejtën të zgjidhë në rrugë gjyqësore pretendimet për të drejtat e pronësisë, sipas legjislacionit në fuqi.