Yuri Kim i shkon në zyrë, Rama: Biseda të mira, për të përmbysur me fakte ' kështjellën' e baltës
Ambasadorja e SHBA- ve, Yuri Kim, takoi dje kryeministrin Edi Rama. Zyra e shtypit të ambasadës së SHBAve në Tiranë zbardhi çfarë u diskutua në takimin dy palësh. Sipas njoftimit, biseda u fokusua në zhvillimet e ditëve të fundit, sikurse është shembja e godinës së Teatrit Kombëtar, ngjarje e cila ka krijuar debat publik. Në këtë pikë, ambasadorja amerikane thekson se është e rëndësishme gjithëpërfshirja në qeverisje, në një vend që synon të bëhet anëtar i Bashkimit Europian. "Ambasadorja e SHBA- ve, Yuri Kim, u takua sot ( dje) me kryeministrin Rama për të diskutuar mbi ngjarjet e fundit. Ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO- s dhe vend që synon anëtarësimin në BE. Ata u pajtuan se është thelbësore që Shqipëria të vijojë në rrugën e saj drejt arritjes së dakordësisë për reformën zgjedhore dhe masave të tjera që u janë premtuar qytetarëve të Shqipërisë", thuhet në njoftimin e ambasadës. Gjatë ditëve në vijim, ambasadorja amerikane do të takohet edhe me kreun e PD- së. Kryeministri Edi Rama shkruan në "Twitter" pas takimit me ambasadoren: "Biseda të mira sot me miq ndërkombëtarë jashtë vendit, për të përmbysur me fakte kështjellën e baltës së eksportuar nga prodhuesit e shpifjeve për godinën e shembur dhe ngjarjet rrotull saj! Gënjeshtra vrapon më shpejt se e vërteta, po këmbët e shkurtra e lënë në mes të rrugës. Biseda të mira edhe me miqtë ndërkombëtarë në Tiranë dhe dakordësi e plotë për të parë përpara të gjitha bashkë, duke adresuar menjëherë domosdoshmërinë e finalizimit të reformës zgjedhore, me të gjithë gatishmërinë tonë për përmbushjen e rekomandimeve të OSBE/ ODHIR- it", - shprehet z. Rama.