COVID- 19, epidemiologu Alimehmeti: Izolimi gjatë majit, i panevojshëm
Statistikat/ Vdekjet në janar- mars 2020 ranë me 3.9% krahasuar me një vit më parë "Shifrat tregojnë se vdekjet nga virusi nuk janë fshehur"
Vdekjet totale në Sh qipëri në periudhën janar- mars 2020 ranë me 3.9% në krahasim me periudhën janar- mars 2019. Të dhënat janë bërë me dije nga dr. Shk. Ilir Alimehmeti, epidemiolog klinik dhe njëkohësisht lektor në Fakultetin e Mjekësisë në Universitetin e Mjekësisë në Tiranë, i cili ka bërë një analizë mbi lidhjen që ekziston mes numrit total të vdekjeve dhe koronavirusit. Ai nënvizoi se izolimi gjatë muajit maj duhej evituar dhe shtoi më tej se numri i vdekjeve ka rënë në çdo rreth të Shqipërisë, me përjashtim të Korçës. "Krisma nuk pati miqtë e mi! Në Shqipëri, në periudhën janar- mars 2020 vdekjet ranë. Vdekjet totale në Shqipëri në periudhën janar- mars 2020 ranë me 3.9% në krahasim me periudhën janar- mars 2019. Jo vetëm kaq, por kanë rënë në çdo rreth të Shqipërisë me përjashtim të Korçës! Kështu, në Dibër vdekjet bien me 21.0%, në Kukës me 14.1%, në Shkodër vdekjet bien me 10.8%, në Durrës me 7.6%, ndërsa në Vlorë me 4.6%", - theksoi Alimehmeti. Ky i fundit bën me dije se në Fier vdekjet ranë me 3.7%, në Berat me 3.2%, në Gjirokastër vdekjet kanë rënë me 3.2% etj. Ndërkohë, vetëm në Korçë numri i vdekjeve ka pasur një rritje me 2.8% gjatë periudhës janar- mars 2020 krahasuar me një vit më parë.
IZOLIM I PANEVOJSHËM
Duke u nisur nga të dhënat e sipërpërmendura, epidemiologu Ilir Alimehmeti rrëzoi teoritë se në janar- mars vdekjet nga koronavirusi janë fshehur. "Në këtë periudhë janë regjistruar 13 vdekje me COVID- 19 ndër 31 në total, pra 41.9% e vdekjeve totale nga COVID- 19. Këto shifra flasin kundër mendimit se vdekjet nuk po raportoheshin. Këto shifra flasin kundër mendimit se njerëzit po vdisnin në shtëpi me COVID- 19. Këto shifra flasin edhe kundër mendimit se vdekjet e shkaktuara nga COVID- 19 mund të kenë ndodhur në muajt janar- shkurt. Këto muaj janë të përfshirë në analizë dhe vërehet rënie në çdo rreth. Këto shifra flasin edhe për faktin se izolimi i Shqipërisë pas datës 30 prill ka qenë krejtësisht i evitueshëm! Siç u parashikua, çdo gjë shkoi mirë në janar- mars 2020!", - tha Alimehmeti.