Rama publikon videon: Investimi që do të punësojë një numër të konsiderueshëm njerëzish
Kantieret e Rilindjes Urbane, kryeministri: Gur- gur bëhet mur
Kryeministri
Edi Rama e nisi dje javën e re me një lajm të mirë nga Tamara e Malësisë së Madhe, teksa thekson se po përfundon fabrika e re agropërpunuese e përgatitjes së esencës së frutave dhe prodhimin prej tyre të lëngjeve natyrale. Sipas kreut të qeverisë, ky investim do të ndikojë ndjeshëm në ekonominë lokale, si dhe do të punësojë një numër të konsiderueshëm njerëzish. “Mirëmëngjesi me një nga plot e plot shembujt e bukur frymëzues të punës, që nuk bëjnë lajm! Në Tamarë të Malësisë së Madhe, me mbështetjen e Agjencisë për Zhvillim Bujqësor dhe Rural, po përfundon fabrika e re agropërpunuese e përgatitjes së esencës së frutave dhe prodhimin prej tyre të lëngjeve natyrale. Ky investim do të ndikojë ndjeshëm në ekonominë lokale dhe një numër i konsiderueshëm njerëzish të zonës do të punësohen, por njëkohësisht fermerët do të kenë një destinacion për të tregtuar frutat e tyre”, - shprehet z. Rama. “Gur- gur, bëhet mur”. Ky është një tjetër mesazh i kryeministrit Edi Rama, teksa ai tregon disa nga kantieret e Rilindjes Urbane, që janë shtrirë në disa qytete. Kreu i qeverisë theksoi se për jetësimin e këtyre projekteve punohet pa pushim. “Kantieret e rilindjes urbane nga Unaza e Bajram Currit në Unazën e re të Konispolit, nga rruga e Thethit në Kalanë e Tepelenës dhe Lungomaren e Sarandës, nga rrugët e fshatrave të Malësisë së Madhe, Elbasanit, Beratit e Përmetit deri te Lungomarja e Durrësit dhe me radhë, ku punohet pa pushim për Shqipërinë që duam”, - shprehet kryeministri Rama.