Nisma, deputetët socialistë kundër përgjimeve nga policia pa miratimin nga prokuroria

Pa

kaluar as 6 muaj nga ngritja e Operacionit të Forcës së Ligjit, Ministria e Brendshme kërkon që të ngrejë një tjetër strukturë kundër krimit të organizuar. Komiteti Antikrim është struktura e re, e cila po shqyrtohet aktualisht nga komisionet e Kuvendit. Sipas nismës që ndryshon ligjin për Policinë e Shtetit, Komiteti Antikrim kryesohet nga ministri i Brendshëm, ndërsa ka në përbërje ministrin e Drejtësisë, ministrin e Financave, prokurorin e përgjithshëm, drejtuesin e SPAK- ut, drejtorin e Shërbimit Informativ të Shtetit si dhe atë të Policisë së Shtetit. Për deputetët e opozitës, kjo është antikushtetuese, pasi prokurori i përgjithshëm dhe SPAK nuk duhet të kenë ndikim politik. Sipas “Vizion Plus”, pritet që me këtë projektligj të ndryshojë edhe neni 131 i ligjit në fuqi për policinë, duke i dhënë kompetencë policisë për përgjime pa miratimin e prokurorisë. Për Murrizin, ky është kthim pas në kohën e diktaturës. Edhe anëtari tjetër i Komisionit të Sigurisë, Lefter Maliqi, shprehet se këto janë tentativa për të kapur sistemin e drejtësisë. Por deputeti socialist Xhemal Qefalia sqaron se ky komitet ka trajtë këshilluese dhe jo urdhëruese, duke hedhur poshtë aludimet e kolegëve të tij. Por, absurde sipas Qefalisë janë përgjimet nga policia pa kërkesë të prokurorisë. Ligjvënësi socialist kundërshton ashpër ministrin Lleshaj në këtë pikë të ligjit. Kujtojmë se Partia Socialiste në kohën kur ishte në opozitë ngriti dy komisione hetimore, një kundër ish- ministrit të Mbrojtjes Imami dhe një kundër SHISH, sepse aludoi që po kryenin përgjime pa pasur miratimin e prokurorisë.