COVID- 19/ 26 raste të reja në Tiranë, asnjë rast në zonat e tjera
MSHMS: 220 pacientë aktivë, 24 të shtruar e 3 në terapi intensive
Numri i të prekurve nga koronavirusi në Shqipëri ka pësuar sërish rritje për të tretën ditë radhazi. Brenda 24 orëve të fundit janë konfirmuar 26 raste të reja pozitive me COVID- 19, të regjistruara të gjitha në Tiranë. Sakaq, 20 të infektuar rezultojnë në Shërbimin e Mjekësisë Interne në QSUT, pas infektimit që kanë pësuar nga një infermiere. Të dhënat mbi situatën epidemiologjike në vend janë bërë publike dje nga specialistja e Institutit të Shëndetit Publik, Rovena Daja, në komunikimin e përditshëm për mediat e qytetarët. "Ju informojmë rreth situatës së COVID- 19 në Shqipëri gjatë 24 orëve të fundit. Gjatë 24 orëve të fundit janë testuar 225 qytetarë si të dyshuar të prekur me COVID- 19 dhe janë konfirmuar 26 raste pozitive, të gjitha në Tiranë. Nga hetimi i thelluar epidemiologjik janë testuar 73 personel shëndetësor, nga të cilët 12 kanë rezultuar pozitivë, në QSUT, të gjithë pa simptoma. Në total janë 20 të prekur në QSUT, personel shëndetësor dhe pacientë, kontakte të rastit të identifikuar tri ditë më parë", - tha Daja në fjalën e saj. Më tej kjo e fundit shtoi se Tirana vazhdon të jetë vatra kryesore në vend me një numë të lartë të rasteve ditore të konfirmuara pozitive me COVID- 19 e bëri me dije se vijon hetimi i thelluar epidemiologjik edhe për disa raste të reja në kryeqytet. Ndërkohë, të gjithë zonat e tjera në Shqipëri rezultojnë për të dytën ditë radhazi pa raste të reja. Në vendin tonë aktualisht janë 220 persona aktivë me COVID- 19, kryesisht ne Tiranë, Durrës dhe Krujë. Në spitalin infektiv aktualisht po trajtohen 24 pacientë, nga të cilët 3 janë në terapi intensive. Në 24 orët e fundit janë të shëruar 11 qytetarë, duke e çuar në 823 numrin e të shëruarve që nga fillimi i epidemisë. Nga fillimi i epidemisë janë kryer mbi 15 mijë testime molekulare dhe serologjike, ndërsa numri i rasteve të konfirmuara pozitivë në të gjithë vendin është 1076. Prej tyre, mbi 76% janë të shëruar.