Prokuroria thërret specialistët e ndërtimit që kërkuan shembjen e Teatrit

“Aleanca” i akuzoi për "shpërdorim detyre", ekspertim fiktiv të pabazuar në verifikim

Nxorën konkluzionin se Teatri Kombëtar duhet shembur, Prokuroria e Tiranës thërret në pyetje 3 specialistët! Ka qenë ky lajmi i bërë publik dje. Prokuroria e Tiranës ka thirrur për të marrë në pyetje tre specialistët e Institutit të Ndërtimit, që përpiluan akt- ekspertizën dhe dolën në konkluzionin se godina e Teatrit Kombëtar duhet shembur.

Ka qenë "Aleanca për Mbrojtjen e Teatrit Kombëtar", që i ka kallëzuar në Prokurorinë e Tiranës përgjegjësit e Institutit të Ndërtimit, të cilët kanë përpiluar ekspertizën mbi godinën e Teatrit Kombëtar, ku u mbështet edhe vendimi i Këshillit Bashkiak për shembjen e godinës, që tashmë prej dy vitesh është në qendër të debateve. Padia, qe bërë para shembjes së Teatrit.

Personat e kallëzuar janë inxhinierët Olsi Nunaj dhe Artur Hasantare si dhe arkitektja Elbarina Kola, që sipas kallëzuesit kanë kryer një ekspertim "fiktiv, i pabazuar në verifikime konkrete të gjendjes së Teatrit Kombëtar".

Tre personat janë akuzuar për veprën penale "Shpërdorim Detyre" të parashikuar nga neni 248 i Kodit Penal, e kryer në bashkëpunim.

Në raportin e Institutit të Ndërtimit shkruhej se, "kushtet aktuale të godinës së Teatrit Kombëtar nga ana statike nuk janë të përshtatshme për kryerjen e aktiviteteve, ato janë jashtë normave të projektimit dhe shfrytëzimit të një objekti të kësaj kategorie".

Ndërkohë, kallëzuesit pretendojnë që këto vlerësime janë "të pabazuara në verifikimet në terren. Ekspertët kanë marrë atribute që nuk i takojnë me ligj duke çuar Këshillin Bashkiak në një vendimmarrje të gabuar". Sipas "Aleancës", vendimi i prishjes së godinës së Teatrit Kombëtar rrezikon "një përplasje institucionale të fortë dhe qyteti rrezikon një konflikt civil me pasoja të paparashikueshme për rendin dhe sigurinë publike".

Në kallëzimin drejtuar Prokurorisë së Tiranës, përfaqësuesit e Aleancës për Mbrojtjen e Teatrit ngrinin edhe disa pyetje:

"1. Këta tre shtetas në cilësinë e ekspertëve si arritën t'i vlerësojnë kushtet aktuale të godinës së Teatrit Kombëtar kur nuk kanë bërë ekspertim fizik të godinës?

2. Mbi çfarë provash shkencore e bazojnë këtë përfundim këta ekspertë?

3. Këta ekspertë kanë dhënë mendim personal bazuar në përfundimet e tyre shkencore konkrete apo i janë referuar nga fillimi deri në fund një ekspertimi të kryer nga ekspertë të tjerë?

4. Nëse këta shtetas i janë referuar vetëm aktit të ekspertimit të vitit 2018, atëherë çfarë kuptimi ka ekspertimi i tyre dhe mbi çfarë tagri e kanë referuar aktin e ekspertimit të datës 13.05.2020?".

Aleanca shtonte se, "3 nga 5 inxhinierët nuk kanë qenë asnjëherë në objekt. Këta tre specialistë i kanë propozuar bashkisë dhe këshillit të bashkisë shembjen e objektit pa ardhur dhe konstatuar objektin. Ata duhet të kishin ardhur ta këqyrnin. Këta nuk kanë qenë në aktin e 2018, janë të futur rishtazi dhe duket që janë të përdorur për të firmosur këtë akt, për të cilin bashkia mori vendimin për ta prishur. Nuk ka akt të ri konstatimi. Ky akt konstatim është bërë në zyra. Ne i padisim tre inxhinierët e institutit të ndërtimit për shpërdorim detyre", - tha një prej përfaqësuesve të "Aleancës për Mbrojtjen e Teatrit".