Provimi i shtetit, zbardhen emrat e 275 stomatologëve që do të testohen

Kur do të kryhen testimet për infermierët, fizioterapistët e teknikët e imazherisë QSHA: Kujdes, dokumentacioni i plotë që duhet të paraqisni

Përgjatë muajit korrik po zhvillohet provimi i shtetit për profesionet e rregulluara në fushën e mjekësisë. "Gazeta Shqiptare" zbardh sot listat me emrat e punonjësve të shëndetësisë dhe datat përkatëse të testimit sipas profesionit të mjekut, farmacistit e stomatologut. Përkatësisht sot publikohen emrat e 275 stomatologëve që do t'i nënshtrohen provimit të shtetit. Ndërkohë për të gjithë kandidatët e interesuar për provimin e shtetit në Mësuesi, Infermieri, Mami, Fizioterapi, Logopedi, Teknik Imazherie, Teknik Laboratori dhe Portal i Infermierit, QSHA bën me dije se provimet do të planifikohen të zhvillohen pas datës 18.08.2020.

DOKUMENTACIONI

Qendra e Shërbimeve Arsimore thekson se kandidatët nuk duhet të harrojnë dokumentacionin ditën e testit. "Ditën e provimit kandidati duhet të jetë i pajisur me: Letërnjoftim ( Kartë ID ose Pasaportë) për pjesëmarrje në provimin e shtetit ( dokumenti origjinal); Kopje të Kartë ID ose Pasaportë; si dhe faturën e pagesës së tarifës së provimit të shtetit për llogari të QSHA, nga një bankë të nivelit të dytë/ postë ( sipas faturës për arkëtim të publikuar në faqen zyrtare të QSHA) sipas herës së pjesëmarrjes",- nënvizon QSHA. Kjo e fundit shton, gjithashtu, se fatura duhet të ketë vulën e bankës përkatëse.

RREGULLORJA

Qendra e Shërbimeve Arsimore njofton të gjithë kandidatët që të paraqiten pranë godinës së këtij institucioni 30 minuta para provimit. "Për të gjithë kandidatët aplikantë për provimet e shtetit për profesionet e rregulluara të mjekut, farmacistit, stomatologut, mamisë, fizioterapistit, logopedistit, teknikut të imazherisë dhe teknikut të laboratorit, ju bëjmë me se provimi i Shtetit për profesionet e rregulluar të fushës së mjekësisë do të zhvillohet nga fillimi i muajit korrik 2020 e në vijim. Provimi i Shtetit do të zhvillohet në godinën e Qendrës së Shërbimeve Arsimore ( më poshtë QSHA) me adresë: Bulevardi "Zhan D'Ark", nr. 23, Tiranë ( ose godina e ish ATSH). Kandidati duhet të paraqitet në QSHA 30 min. para fillimit të provimit të shtetit",- bën me dije QSHA. Sakaq, në kuadër të situatës së krijuar nga pandemia COVID- 19 dhe në vijim të masave parandaluese të përhapjes së tij, nëpërmjet urdhrave të publikuar nga Ministria e Shëndetësisë dhe Mbrojtjes Sociale, provimet do të zhvillohen duke zbatuar me përpikëri rregullat. "Qendra e Shërbimeve Arsimore është përgjegjëse për ofrimin e sigurisë maksimale dhe kushteve të përshtatshme higjieno - sanitare, duke ofruar: pastrim dhe dezinfektim të ambienteve të provimit me solucione dezinfektuese të miratuara, përpara dhe pas çdo seance provimi; pastrim dhe dezinfektim të pajisjeve fizike të ambienteve të provimit, si: kompjuterët, pajisjet elektronike, karriget, tavolinat, etj; vendosje të solucioneve dezinfektuese në hyrje të çdo ambienti provimi; respektim të distancës 1,5 - 2 metër ndërmjet kandidatëve gjatë gjithë proceseve të zhvillimit të provimit; mundësinë e kryerjes së provimit në kabina të veçanta për secilin kandidat, duke respektuar distancën fizike nga njëri - tjetri; pajisjen me mjetet e duhura mbrojtëse si maska dhe doreza plastike, të stafit të institucionit dhe personave të jashtëm, të përfshirë në proceset e zhvillimit të provimit",nënvizon QSHA. Gjatë paraqitjes për pjesëmarrje në provim, kandidati duhet të ketë parasysh që të paraqitet pranë QSHA- së, i pajisur me mjetet mbrojtëse, maskë dhe doreza plastike; të zbatojë ruajtjen e distancës fizike 1,5 - 2 metër nga kandidatët e tjerë; të ketë me vete vetëm dokumentet e kërkuara dhe mjetin e identifikimit; të ketë me vete stilolaps për nënshkrimin e deklaratës dhe rezultatit të provimit; të mos ketë me vete celularë, çantat dhe sende të tjera personale të panevojshme për zhvillimin e provimit.