“Jo variant, por angazhim”! Rama flet për negociatat dhe mos tërheqjen nga hapja e listave
Kryeministri insiston një tjetër takim në Këshill, PD kërkon kohë
Palët politike në Këshil lin politik nga takimi i djeshëm, nuk dolën me një marrëveshje duke mbetur në të njëjtat qëndrime, por kryeministri Edi Rama e vlerësoi tryezën si pozitive. Duke e konsideruar një diskutim të gjerë dhe interesant, Kryeministri Edi Rama u shpreh i gatshëm për ta vijuar dialogun me opozitën parlamentare dhe atë jashtë parlamentare. Pas 5 orësh mbledhje të Këshillit Politik, palët dolën pa dakordësi. Megjithatë kreu i qeverisë u duk pozitiv se si forcë politike më e madhe, Partia Socialiste do të mund ta bindë për të qenë më fleksibël në këtë proces opozitën parlamentare. Pas mbledhjes maratonë të Këshillit Politik, kryeministri theksoi se marrëveshja e 5 qershorit nuk preket dhe tha se afati për miratimin e saj në parlament është fundi i Korrikut. Ai la të kuptohet se palët kanë mbetur në pozicionet e tyre. Mbledhja e Këshillit Politik do të vijojë edhe në ditët e ardhshme. Rama tha se PS ishte e gatshme ta vazhdonte dialogun pa ndërprerje nga nesër porse opozita jashtëparlamentare kërkoi kohë. Në këtë pikë ai u kujdes të kujtonte se nuk kanë shumë kohë në dispozicion pasi reforma zgjedhore duhet të kalojë në Kuvend në fund të këtij muaji. “Diskutimi ishte i gjatë, interesant, ne sigurisht që nuk është se hamë ndonjë gjë të re, gjëra që ju i dini që opinioni publik i di. Kemi një qëndrim sipas nesh shumë të qartë dhe ka një realitet politik, i cili imponon një qasje që për ne është e diskutuar le të themi si forca më e madhe, por që njëkohësisht kemi dhe detyrimin të krijojmë një proces dhe të arrijmë në një rezultat ku nëse të gjitha palët nuk janë 100 dakord me të gjitha, së paku se cila palë të ketë pjesën e vet le të themi. Mendoj që është e rëndësishëm të diskutojmë, të vazhdojmë të diskutojmë. Ishim të gatshëm ta vazhdonim diskutimin që nesër, pa ndërprerje. Përfaqësuesit e opozitës jashtë parlamentare kërkuan kohë, është në të drejtën e tyre. Kemi një kalendar, i cili ka një kufi të përcaktuar që është fundi i këtij sesioni parlamentar. Besoj se diskutimi ishte pozitiv. Koha ka kufizimin e vet për shkak se hapja e listave për ne nuk është një variant, por një angazhim karshi njerëzve dhe ne si partia më e madhe dëshirojmë t’i përfshijmë qytetarët në procesin e përcaktimit të atij që do të jetë grupi jonë i nesërm parlamentar. Sigurisht që duhet të çojmë deri në fund për sa na takon edhe angazhimin e nënshtruar me 5 qershor. Kështu që është një proces me dy korsi ku stacioni është fundi i Korrikut. Ne jemi më të mëdhenjtë dhe janë dy palë më të vogla që i duan të gjitha për veten e tyre dhe nuk i hapin rrugë njëratjetrës, por do të mundohemi të punojmë dhe do të mundohemi të bindim opozitën parlamentare që duhet të jetë me fleksibël në këtë proces. Problemi këtu është që opozita parlamentare nuk është vetëm një parti, janë shumë parti, janë shumë individë, kanë një qëllim të përbashkët, kanë një vijë të përcaktuar. Në fund duhet të prevalojë arsyeja e thjeshtë që nuk mund t’i kesh të gjitha dhe që duhet edhe të tjerët të marrin diçka”, - tha z. Rama.
OPOZITA
Pas mbledhjes së Këshillit Politik, sekretari I përgjithshëm I PD- së Gazment Bardhi u shpreh se nuk u mor përgjigje kur miratohet draft- ligji pa ndryshime për Reformën Zgjedhore. Bardhi u shpreh se PD i ka kërkuar kryeministrit Rama një datë për miratimin e kësaj marrëveshjeje për të cilën Këshilli Politik ka gjashtë muaj që punon. Po ashtu, ai deklaroi se opozitës i është konfirmuar që duhet të rihapen çështje për të cilat u ra dakord me konsensus më 5 qershor. Sekretari i Përgjithshëm i PD- së, Gazment Bardhi u shpreh se PS kërkoi rihapjen e çështjeve të firmosura në marrëveshjen e 5 qershorit. Gjithashtu, ai shprehet se kryeministri nuk ka dhënë një përgjigje për miratimin në parlament të draftit të 5 qershorit. “Në 5 qershor të gjitha palët nënshkruan marrëveshjen dhe është kthyer në draftligj që pret miratimin nga Parlamenti. Në pikë të parë i kërkuam kryetarit të PS se kur do të ndodhë miratimi i marrëveshjes. Nuk kemi marrë përgjigje gjatë takimit se kur do të votohet pa ndryshime. Dua të konfirmoj që opozita e bashkuar i qëndron marrëveshjes së 5 qershorit. Nuk morën të gjitha palët atë që donin mirëpo ishte një marrëveshje konsensuale që u mbështet nga ndërkombëtarët. Sot na u konfirmua që ne do të na duhet të rihapim sërish çështje që kemi dakordësuar në marrëveshjen e 5 qershorit. Nuk mundemi që të hedhim në kosh punën 6 mujore të Këshillit Politik. PS kërkon që t’i rikthehemi çështjeve për të cilat kemi rënë dakord. Ne kemi bërë një diskutim, kërkojmë që palët e tjera që kanë firmosur të jenë serioz në këtë proces. Çështja e respektimit është një kusht e nisjes së bisedimeve me BE. Ka një apel nga faktori ndërkombëtar për të mos e prekur këtë marrëveshjen. Për ne është e papranueshme t’i rikthehemi çështjeve të dakordësuar në 5 qershor. Ne i kemi dhënë kryeministrit që të na informojë se kur do të kalojë për votim pa ndryshim marrëveshja e 5 qershorit. Nuk ka një datë se kur do të votohet në parlament. Presim një përgjigje prej tyre”, - deklaroi z. Bardhi.