Zgjedhorja dhe ndryshimet kushtetuese, s’ka dakordësi PS- PD- LSI në Këshillin Politik
Palët larg paktit, pa konsensus listat e hapura dhe koalicionet
Pas 5 orësh mbledhje të Këshillit Politik, palët politike dje dolën pa dakordësi mes tyre. Kryeministri Edi Rama në emër të mazhorancës kërkoi ndryshime në Kushtetutë, ndërkohë që opozita jashtëparlamentare nuk lëviz nga marrëveshja e 5 qershorit. Ndryshe nga Këshilli Politik që prodhoi draftin konsensual të amendamenteve të Kodit Zgjedhor, këtë herë Këshilli Politik kishte një formulë më të zgjeruar. Nga mazhoranca, përveç Damian Gjiknurit që përfaqësonte më herët Partinë Socialiste në Reformën zgjedhore, ishte i pranishëm edhe kryeministri Edi Rama. Ndërkohë, nga opozita e bashkuar nuk ishte lideri Lulzim Basha, por sekretari i përgjithshëm i PD- së, Gazment Bardhi. Ky takim u hodh si ide nga Presidenti Ilir Meta dhe u mirëprit nga të gjitha palët. I pari që konfirmoi pjesëmarrjen ishte kryeministri Edi Rama. Ndërkohë, Lulzim Basha refuzoi për shkak të vizitës dyditore në Kosovë, duke deleguar që të shkonte sekretari Bardhi.
DEBATET
Mbledhja e djeshme e Këshillit Politik, e cila zgjati 5 orë, u shoqërua me debate dhe kundërshti të forta mes palëve në tryezë. Burime brenda mbledhjes bënë me dije se opozita gjatë këtij takimi me dyer të mbyllura i ka qëndruar fortë mosprekjes së marrëveshjes së 5 qershorit. Gazment Bardhi, sekretar i përgjithshëm i PD- së mësohet se gjatë këtij takimi ka kundërshtuar kryeministrin Rama, i cili sipas burimeve, ka kërkuar të rihapet edhe njëherë diskutimi i marrëveshjes së 5 qershorit dhe ndryshimi i draftit final. Në argumentin e tij, Rama është shprehur se janë tri pole politike dhe për këtë arsye duhet të rishikohen edhe kërkesat e opozitës parlamentare, që në tryezë përfaqësoheshin nga Myslim Murrizi dhe Rudina Hajdari. “Jemi gjithmonë 3 pole jo dy, është edhe opozita parlamentare. Pse jeni kundër hapjes së listave?”, mësohet se jetë shprehur Rama. Por, për demokratin Gazment Bardhi, dokumenti final i 5 qershorit nuk mund të preket, pasi është produkt i punës 6- mujore dhe i dakordësuar me partnerët ndërkombëtarë në rezidencën e ambasadës amerikane në Tiranë. Burimet bënë të ditur se gjatë mbledhjes, Bardhi është shprehur se: “Kuptuam nga diskutimi i kryetarit të Partisë Socialiste që qëllimi është të rihapim edhe njëherë diskutimin për përmbajtjen e marrëveshjes së 5 qershorit dhe të bëjnë ndryshime të saj. Drafti i marrëveshjes së 5 qershorit është produkt i një pune të përbashkët 6- mujore është miratuar dhe nënshkruar me konsensusin e të gjitha palëve, me mbështetjen e partnerëve ndërkombëtarë. Ne i qëndrojmë firmës sonë dhe deklarojmë që nuk mund të rishihet apo rishkruhet asnjë fjalë ndryshe nga ajo që palët kanë dakordësuar dhe nënshkruar bashkërisht. Çështjet që ju shtruat bien në kundërshtim dhe ndryshojnë marrëveshjen e 5 qershorit dhe prishin dakordësinë që ne kemi arritur aty. ( nenet 19 dhe 36 të draftit të nënshtruar në zbatim të marrëveshjes së 5 qershorit). Gjithashtu, në mbledhjet e Këshillit Politik, por edhe gjatë diskutimeve në rezidencën e ambasadores së SHBA- ve, përfaqësuesi zyrtar i Partisë Socialiste nuk ka dhënë konsensusin për ndryshimin e sistemit zgjedhor dhe ka dakordësuar se kjo çështje nuk mund të diskutohet tani, por në një fazë më të vonshme. Ky fakt konfirmohet edhe nga përmbajtja e marrëveshjes së 5 qershorit, ku specifikohet në shënimin nr. 2 që “nuk ka konsensus për ndryshimin e sistemit”. Sipas pikës 12 të marrëveshjes së firmosur më 5 qershor “12. Hyrja në fuqi”: “ky shënim është i zbatueshëm për zgjedhjet e radhës”.