I gjenden heroinë dhe një tufë parash në makinë, arrestohet 41- vjeçari nga Mirdita

MIRDITË

– Një 41vjeçar është vënë në pranga nga policia e Mirditës, pasi akuzohet se shpërndante drogëra të forta në doza të vogla. Sipas njoftimit zyrtar, 41vjeçari u arrestua në Mirditë. Mësohet se teksa shtetasi me iniciale A. N., po kalonte në fshatin Perlat, blutë e kanë ndaluar dhe i kanë kontrolluar makinën, të cilën po e drejtonte. Nga kontrolli, në mjet u gjet dhe u sekuestrua një sasi e vogël heroinë dhe një shumë e konsiderueshme parash, që dyshohet se ishin përfituar nga shitja e drogës. “Goditet një tjetër rast i shpërndarjes së drogave të forta në doza të vogla. Në pranga ka rënë poseduesi i lëndës narkotike. Shërbimet e Komisariatit të Policisë Mirditë , në bazë të informacioneve të marra në rrugë operative se një shtetas shpërndante lëndë narkotike në doza të vogla, kanë organizuar punën, ku në fshatin Perlat kanë bllokuar mjetin me drejtues shtetasin A. N., duke bërë kontroll ndaj tij dhe të automjetit. Si rezultat i kontrollit, policia gjeti dhe sekuestroi në cilësinë e provës materiale doza me lëndë narkotike heroinë dhe një sasi lekësh, të dyshuara të përfituara nga shitja e lëndës narkotike”. Në përfundim të veprimeve të kryera, nga specialistët për Hetimin e Narkotikëve në Drejtorinë Vendore të Policisë Lezhë , është bërë arrestimi në flagrancë i shtetasit A. N., 41 vjeç, banues në Mat, për veprën penale “Prodhimi dhe shitja e narkotikëve” si dhe është bërë sekuestrimi i automjetit. Materialet procedurale i kaluan Prokurorisë pranë Gjykatës së Shkallës së Parë Lezhë , për veprime të mëtejshme”, njoftoi policia.