Pakti, Balla: Ndryshimet në Kod s’janë reformë zgjedhore. Më 30 korrik votojmë hapjen e listave
Kuvendi miratoi dje me 99 vota pro marrëveshjen e 5 qershorit të arritur mes palëve, teksa kreu i Grupit Parlamentar të PS, Taulant Balla, tha se “nuk është momenti për të duartrokitur, pasi ndryshimet në Kod nuk janë reformë zgjedhore”. Nga foltorja e Kuvendit, Balla falënderoi opozitën në parlament që i qëndruan marrëveshjes me PS, ndërsa tha se më 30 korrik do të miratohet edhe haja e listave. “Nuk është rasti për të duartrokitur një reformë, sepse ndryshimet në Kod nuk janë reformë zgjedhore, por një konservim i gjithçka kemi pasur me dy- tre ndryshime të vogla. Uroj që shumë shpejt KQZ i ristrukturuar të startojë proceduar e nevojshme me qëllim, që më 9 maj, në ditën e Europës, në zgjedhjet e ardhshme parlamentare, shqiptarët të votojnë me shumicë dhe të aplikohet teknologjia. Shpreh një falënderim për z, Stojku, Musai e në mënyrë të veçantë z. Murrizi, kemi firmosur së bashku një marrëveshje për të mundësuar këtë votim dhe dua të nënvizoj respektimin e kësaj marrëveshje. Mbështesim votimin e Kodit Zgjedhor dhe kjo tregon një seriozitet që më konfirmon atë që kemi rënë dakord që edhe më 30 korrik, në këtë sallë, për të miratuar hapin historik që duhet të hedhë demokracia parlamentare në Shqipëri përmes hapjes së listave, të jetë po kaq mbështetëse. Gjej rastin të shpreh garancinë tonë që më 30 korrik ne do ta mbështesim, sepse e konsiderojmë hapjen e listave transferim të të drejtës për të zgjedhur popullit. përmes hapjes së listave, qytetarëve i jepet një mundësi e madhe për t’i mbajtur zgjedhësit në një kontakt të përhershëm pozitiv. Sistemin proporcional me lista të hapura do t’ia mundësojmë shqiptarëve më 30 korrik. Do të mundësojë dobësimin absolut në udhëheqjen e partive, me pasojë të drejtpërdrejtë në mirëqeverisje”,- tha z. Balla.