INVESTIMI I RI
AKSHI: Rreth 139 milionë lekë investim për zbatimin e projektit. I jepet fund informalitetit
E- transport" është pro jekti më i ri që do të vihet në jetë së shpejti për të lehtësuar transportin ndërqytetas. Ky investim parashikon që biletat të priten "online" nëpërmjet telefonit, në një kohë që qytetarët do të mund të udhëtojnë me më pak kosto. Lajmi është bërë me dije nga Agjencia Kombëtare e Shoqërisë së Informacionit ( AKSHI), e cila theksoi se në këtë mënyrë do të formalizohet tregu i transportit. "Ky investim do të lehtësojë transportin e qytetarëve, të cilët do kenë mundësi që t'i presin biletat ' online' përmes telefonit, të zgjedhin shërbimin më të mirë, të udhëtojnë me më pak kosto. Projekti do të formalizojë tregun e transportit, ç'ka do të rrisë cilësinë e shërbimit për qytetarët dhe do të rrisë të ardhurat në buxhetin e shtetit. Nga ana tjetër, investimi do të largojë përfundimisht informalitetin në këtë treg, duke e ndihmuar biznesin e transportit të ulë kostot dhe të rrisë konkurrencën në të mirë të qytetarëve shqiptarë", - bëri me dije AKSHI.
ZGJIDHJA E PROBLEMATIKAVE
Drejtoria e Përgjithshme e Shërbimit të Transportit Rrugor dhe AKSHI do të zbatojnë së shpejti "e- transport" për t'u dhënë zgjidhje këtyre problematikave në transportin ndërqytetës, si: rrjetit aktual me dublikime, i copëzuar; mungesës të së dhënave reale mbi fluksin e udhëtarëve; mungesës së funksionimit të terminaleve ( edhe në qytetet kryesore); mungesës së organizimit të agjencive private; mungesës së stacioneve të qëndrimit; mungesës së informacionit për pasagjerët mbi linjat dhe oraret. Gjithashtu, pritet që nëpërmjet "e- transport" t'i jepet fund tregut informal të shërbimit dhe mundësisë për evazion fiskal, shfrytëzimit të ulët të kapaciteteve dhe ndotjes së lartë të mjedisit, mungesës së iniciativave lehtësuese për nxitjen e investimeve në flotën e mjeteve si dhe aksidenteve rrugore. Nëpërmjet këtij projekti pritet krijimi i një database elektronike me të gjitha të dhënat dhe dokumentacionin e subjekteve të transportit ndërqytetës, krijimin e llogarive për shoqëritë e transportit ndërqytetës, njësisë menaxhuese të terminalit dhe agjencisë së biletave, aplikim "online" në portalin "e- Albania" për licencim/ certifikim, monitorimi i subjekteve nëpërmjet migrimit të të dhënave për zbatimin e kushteve të përcaktuara në licencë ( oraret, frekuenca, itinerari); mundësia e gjenerimit të skemave të subvencionimit të operatorëve. Ndërkohë pritet që "e- transport" të sigurojë përdorimin e të dhënave të "e- transport" për prerjen e biletave nga agjencitë, aplikacioneve të ndryshme ose pajisjeve të tjera; përdorimin e të dhënave mbi fluksin për miratimin e linjave, orareve si dhe integrimin me sisteme të treta. "Projekti ' e- transport' do të sjellë formalizmin e rrjetit të transportit ndërqytetës, duke rritur cilësinë e ofrimit të shërbimit për qytetarët dhe turistët. Me anë të dixhitalizimit të këtij procesi do të behet e mundur prerja e biletës edhe ' online' nëpërmjet çdo telefoni apo kompjuteri, duke shmangur në ketë mënyrë vajtjen në terminalin kryesor dhe gjendjen përpara faktit ku mjeti i transportit që niset në atë orar nuk ka vende të lira. ' e- transport' do të ndërlidhet në të ardhmen e afërt edhe me sistemin elektronik për menaxhimin e transportit brenda qytetas, duke bërë të mundur blerjen e biletave të ndërthurura me një çmim më të lirë se sa blerja e tyre në mënyrë të veçantë", - nënvizon Agjencia Kombëtare e Shoqërisë së Informacionit.
ABONIMET MUJORE
Sistemi "e- transport" do të ofrojë edhe blerjen e biletave javore ose mujore, me qëllim uljen e transaksioneve të kryera nga udhëtari. "Blerja e biletave nëpërmjet një sistemi elektronik sjell formalizim të tregut të transportit ndërqytetës, rritje të ardhurash për arkën e shtetit nëpërmjet mbledhjes reale të taksave, lehtësim për udhëtaret në blerjen e biletave të veçanta ose të ndërthurura, mundësi planifikimi fluksi nga ana e shoqërive të transportit ndërqytetës, kontroll më efikas i shoqërive të transportit ndërqytetës nga ana e institucioneve shtetërore, statistika për numrin e udhëtareve për secilën linjë, me qëllim koordinimin e investimeve të shoqërive të transportit dhe të vetë administratës shtetërore. Projekti "e- transport" do të sjellë gjithashtu edhe dixhitalizimin e procesit të aplikimit, trajtimit dhe miratimit ose refuzimit të pajisjes me licencë transporti të shoqërive të transportit ndërqytetës", - shton AKSHI.
EFEKTET E PRITSHME
Sipas AKSHI- t, i gjithë procesi do të kryhet "online" dhe do të sjellë ulje kostosh, shërbim më të shpejtë, aplikim "online" nga kudo dhe kurdo, duke mos u shqetësuar nëse ka kaluar ora 16.30 e mbylljes së zyrave të institucionit, apo për largësinë që ka nga zyra e biznesit. "Vlera e përafërt e përllogaritur për implementimin e sistemit ' etransport' është 138,746,900 lekë dhe në përputhje me dispozitat e VKM- se nr. 710, datë 21 gusht 2013, ' Për krijimin dhe funksionimin e sistemeve të ruajtjes së informacionit, vazhdueshmërisë së punës dhe marrëveshjeve të nivelit të shërbimit'. Mirëmbajtja do të jetë për një periudhë 4- vjeçare, me një vlerë të përafërt të përllogaritur 60,001,333 lekë", - thotë AKSHI.