Shqipëria në kthetrat e COVID- 19, 26 të vdekur brenda një jave
Daja: 19 pacientë janë në terapi intensive dhe 7 të intubuar. Mbani maskat Mbi 1000 pacientë aktivë vetëm në Tiranë, 112 të shtruar në spital
Situatë tejet e rënduar paraqitet lidhur me situatën e koronavirusit në vend. Gjatë javës që lamë pas, plot 26 persona kanë humbur jetën nga virusi vdekjeprurës duke e çuar në 138 numrin e viktimave që nuk kanë mundur të fitojnë betejën me COVID19. Sakaq, në Shqipëri ka 1943 pacientë aktivë ku në krye të listës qëndron Tirana me 1056 të infektuar që ende nuk janë shëruar. Specialistja e ISHP- së Rovena Daja gjatë një komunikimi për mediat ka bërë me dije të dhënat mbi situatën epidemiologjike në vend brenda 24 orëve të fundit. Kështu 4 persona kanë humbur jetën dhe 126 të tjerë kanë rezultuar pozitivë me COVID- 19 pas testimit. "Fatkeqësisht nuk e kanë fituar dot betejën me sëmundjen në spitalin Covid2 "Shefqet Ndroqi", një 51 vjeçar nga Dibra, një 62 vjeçare nga Tirana, një 68 vjeçar nga Shkodra, dhe një 73 vjeçar nga Tirana, më sëmundje bashkëshoqëruese. Ministria e Shëndetësisë dhe Mbrojtjes Sociale i shpreh ngushëllimet familjarëve",- theksoi Daja në fjalën e saj.
TË HOSPITALIZUAR
Aktualisht në spitalin Infektiv dhe spitalin "Shefqet Ndroqi" po trajtohen 112 pacientë, 19 janë në terapi intensive dhe 7 pacientë janë të intubuar.
RASTE TË REJA
Brenda 24 orëve të fundit janë kryer 504 testime ku kanë rezultuar 126 të infektuar të rinj. Sakaq, Tirana vijon të mbetet vatra e zjarrtë me 74 raste të reja Brenda 24 orësh. Ju informojmë për situatën epidemiologjike ne 24 orët e fundit: Janë kryer 504 testime për të dyshuar të prekur me COVID- 19, nga të cilat janë konfirmuar 126 raste pozitive. Shpërndarja gjeografike e rasteve është si vijon: 74 raste në Tiranë, nga raste 9 në Kavajë, Shkodër, 6 në Durrës, nga 4 raste në Krujë, Mirditë, Vlorë, nga 3 raste në Korçë, Lezhë, Vau i Dejës, 2 në Tropojë, nga 1 rast në Elbasan, Kamëz, Lushnje, Pogradec, Sarandë.
Gjatë 24 orëve të fundit janë shëruar 45 qytetarë, duke e çuar numrin e të shëruarve në 2682, që nga fillimi i epidemisë",- shtoi specialistja e ISHP- së.
THIRRJA E MSHMS
"Ministria e Shëndetësisë dhe Mbrojtjes Sociale i drejtohet me një thirrje të rinjve: Tregoni kujdes ju të parët duke vendosur maskën. Mbroni veten, mbroni prindërit, mbroni gjyshërit, mbroni miqtë dhe shokët tuaj. Ministria e Shëndetësisë i rikujton qytetarëve detyrimin ligjor për të vendosur maskën në çdo ambient të mbyllur. Respektoni distancën dhe kujdesuni për higjienën personale dhe kolektive. Kontaktoni nëpërmjet linjës së gjelbër 0800 40 40 me mjekun e familjes, dhe kur keni shenja të sëmundjes duhet të qëndroni të izoluar dhe telefononi në numrin e Urgjencës Kombëtare, 127",- apeloi Ministria e Shëndetësisë.