Koha që zëri i shqiptarëve të dëgjohet ( përmes një flete të thjeshtë)
( Vijon nga faqja 1)
... Partizanët e këtyre listave i mëshonin idesë se votuesit duhet të zgjedhin vetë se cilët kandidatë për deputetë duhet të shkojnë në Kuvend, e jo të dërgojnë atje lista të përgatitura nga kryetarët e partive, si ushqim i parapaketuar.
Si rezultat i ekspozimit të gjerë të opinionit publik me idenë e listave të hapura, një sondazh statistikor i publikuar nga IDRA tregonte se 75% e shqiptarëve ishin pro listave të hapura ( pavarësisht se nuk e kishin shumë të qartë se si do të realizoheshin ato). Të armatosur me rezultatin e atij sondazhi, 28 deputetë të Kuvendit bënë kërkesë zyrtare për një ndryshim të Kushtetutës, që do të mundësonte listat e hapura.
PS- ja e pranoi kërkesën e 28 deputetëve, por me kushtin që listat të ishin pjesërisht të hapura ( për t’i dhënë mundësi partive të dërgojnë në Kuvend aq femra sa të plotësohet kuota gjinore 1/ 3). Gjithashtu, PS- ja kërkoi që në Kushtetutë të pengohen koalicionet paraelektorale shumëlistore, për shkak të vështirësive që do të sillte në administrim një fletë votimi me lista të hapura dhe njëkohësisht me koalicione paraelektorale shumë- listore.
Por një model flete votimi i publikuar sot nga Oerd Bylykbashi, kryenegociatori elektoral i PDsë, demonstron se votimi me lista të hapura e koalicione paraelektorale shumë- listore mund të realizohet fare thjeshtë edhe në qarkun e madh të Tiranës, me plot 34 deputetë ( shihni modelin bashkëngjitur). Ndërsa problemi i kuotave gjinore, sipas Bylykbashit, mund të realizohet gjatë numërimit të votave, përmes mekanizmit të thjeshtë të diskriminimit pozitiv për femrat. Në këtë mënyrë relaizohet votimi me lista të hapura 100%, e jo pjesërisht…
Duket se ka ardhur koha që zëri i shqiptarëve të dëgjohet plotësisht – përmes një flete të thjeshtë votimi.