COVID- 19 shënon 150 viktima në Shqipëri që prej fillimit të pandemisë
Brenda 24 orëve konfirmohen 108 raste të reja dhe dy humbje jetësh. Tirana, vatër e zjarrtë Cami: 125 të hospitalizuar, 17 në terapi intensive dhe 7 të intubuar
Numri i viktimave që nuk kanë mundur t'i mbijetojnë dot betejës me koronavirusin ka arritur në 150 që prej fillimit të pandemisë në 9 mars. Situatë serioze paraqitet edhe në lidhje me numrin e rasteve të pacientëve aktivë, të cilët aktualisht kanë kapur shifrën 2125. Të dhënat mbi situatën epidemiologjike në vend brenda 24 orëve të fundit janë bërë me dije nga Mirela Cami, drejtore e Operatorit të Shërbimeve të Kujdesit Shëndetësor. "Ministria e Shëndetësisë ju informon mbi situatën epidemiologjike në vendin tonë, duke ju drejtuar që në fillim të këtij komunikimi çdo qytetari me thirrjen për të vendosur detyrimisht maskën në ambientet e mbyllura, për të ruajtur distancën në çdo ambient dhe për rëndësinë e higjienës vetjake dhe kolektive për frenimin e përhapjes së COVID- 19. Fatkeqësisht nuk e kanë fituar dot betejën me sëmundjen në spitalin COVID- 1 një 68vjeçare nga Shijaku me disa sëmundje bashkëshoqëruese. Ka humbur jetën në spitalin Covid- 2 "Shefqet Ndroqi, një 60- vjeçare nga Tirana, pa sëmundje të tjera. Ministria e Shëndetësisë dhe Mbrojtjes Sociale u shpreh ngushëllimet familjarëve", - tha Cami.
RASTE TË REJA
Në 24 orët e fundit janë kryer 502 testime për të dyshuar të prekur me COVID19, nga të cilat janë konfirmuar 108 raste pozitive. "Shpërndarja gjeografike e rasteve është si vijon: 52 raste në Tiranë, 12 në Krujë, 7 në Kukës, 6 në Fier, 5 në Mirditë, 4 në Tropojë, nga 3 raste në Vlorë, Kamëz, Përmet; nga 2 raste në Elbasan, Tepelenë, Memaliaj; nga 1 rast në Kurbin, Korçë, Lezhë, Has, Berat, Pogradec, Prrenjas", - bëri me dije drejtoresha e Operatorit të Shërbimeve të Kujdesit Shëndetësor. Aktualisht në spitalin infektiv dhe spitalin "Shefqet Ndroqi" po trajtohen 125 pacientë, 17 janë në terapi intensive dhe 7 pacientë janë të intubuar. Gjatë 24 orëve të fundit janë shëruar 41 qytetarë, duke e çuar numrin e të shëruarve në 2830, që nga fillimi i epidemisë.
APELI I MSHMS
Ministria e Shëndetësisë dhe Mbrojtjes Sociale u ka bërë thirrje edhe njëherë bizneseve, bareve, restoranteve institucioneve të zbatojnë me korrektësi protokollet e sigurisë në punë, të miratuara nga autoritetet shëndetësore. "Telefononi në numrin unik të
Urgjencës Kombëtare 127, nëse keni shenja të sëmundjes dhe në linjën e gjelbër 0800 40 40 për informacion rreth COVID- 19 apo këshillim psikologjik", - apeloi Ministria e Shëndetësisë.