Vuloset ndryshimi në stolin e Kukësit, ikën Orges Shehi, vjen Skënder Gega!

Aventura e radhës për tropojanin që shpalli kampion Partizanin pas 26 vitesh mungesë Prezantimi i trajnerit të ri do të bëhet ditën e hënë

Skënder Gega është tra jneri i ri i Kukësit dhe kjo ishte e treta e vërteta për palët, që në më në fund kanë shtrënguar duart pas dy tentativave të pafinalizuara në të shkuarën, më e fundit pak muaj më parë kur Gjici vendosi t'ia besonte stolin Orges Shehit. Skënder Gega u largua nga Partizani si kampion në fuqi duke rikthyer titullin në kryeqytet pas 26 vitesh mungesë, ndërsa më pas firmosi në Jordani, por situata kaotike e shkaktuar nga pandemia e koronavirusit, bënë që palët të shkëputnin marrëveshjen në mirëkuptim. Në fakt, dita e djeshme për Kukësin ka qenë vërtet impenjative, duke qenë se rreth orës 15: 00, nënkampionët vendosën të mos rinovuar kontratën mes tyre. "Klubi i Kukësit njofton se Orges Shehi nuk është më trajner i skuadrës sonë. Pas përfundimit të sezonit, presidenti dhe trajneri kanë rënë dakord për të mos vazhduar më bashkëpunimin.

Megjithëse një trajner i ri në eksperiencë, presidenti i besoi trajnerit Shehi një nga ekipet më të mira që Kukësi ka pasur. Klubi i Kukësit e falënderon trajnerin Shehi për kontributin e dhënë në këtë periudhë të vështirë për futbollin shqiptar dhe jo vetëm dhe i uron suksese në të ardhmen," ishte njoftimi zyrtar i klubit verilindor, që pak orë më vonë ka shpërndarë një tjetër njoftim për mediat, atë ku njoftohet arritja e dakordësisë me Skënder Gegën. "Klubi i Kukësit njofton se trajneri i ri i skuadrës, do të jetë Skënder

Gega, pasi palët kanë arritur ditën e sotme ( djeshme) akordin. Prezantimi i trajnerit të ri, do të bëhet ditën e hënë në sallën e konferencave në stadiumin "Air Albania", në orën 11: 00. Klubi i uron mirëseardhjen trajnerit Gega dhe suksese me ekipin tonë!"