PPE, Ramës: Nëse do integrimin, mos moho këshillat e KE dhe PE!
Partia Popullore Europiane reagon kundër ndryshimit të njëanshëm të Kushtetutës “U prish konsensusi i arritur ndërkombëtarisht”
Partia Popullore Euro piane, PPE, reagon ashpër pas miratimit të ndryshimeve kushtetuese një ditë më parë në Kuvend, nga mazhoranca dhe opozita parlamentare.
PPE shpreh keqardhjen për këtë vendim, që sipas saj, është i njëanshëm dhe arbitrar. Sipas PPE, nëse kryeministri Edi Rama do vërtet integrimin e Shqipërisë në BE, duhet të mos mohojë këshillat e ndërkombëtarëve.
STATUSI NGA MICHAEL GAHLER “Është për të ardhur keq dhe i shoh mjaft të diskutueshme qëllimet e vërteta që partia qeverisëse e Shqipërisë prishi konsensusin e arritur ndërkombëtarisht me opozitën dhe dje ndryshoi në mënyrë të njëanshme Kushtetutën. Nuk mund të pranohet për askënd që qeveria ‘ Rama’, e cila kërkon negociatat e pranimit me BE- në, të fillojë të ndryshojë në mënyrë arbitrare rregullat e lojës elektorale. Nëse kjo qeveri do me ndershmëri negociatat e pranimit me BE- në, si mund të mohojnë këshillat e Parlamentit Evropian, Komisionit Evropian dhe shteteve anëtare për një çështje kaq të ndjeshme dhe themelore për demokracinë?!
Grupi i PPE do të vëzhgojë me vëmendje lëvizjet e radhës në lidhje me Kodin Zgjedhor dhe do të kërkojë fuqishëm të arrihet konsensusi me opozitën brenda Këshillit Politik. U takon partive dhe popullit shqiptar të mbrojnë demokracinë dhe perspektivën e tyre evropiane”. Deklarata e Gahler vjen pas vendimit të Kuvendit, që miratoi me 106 vota pro ndryshimet kushtetuese të propozuara nga Partia Socialiste dhe opozita parlamentare. Listat e deputetëve në zgjedhjet e vitit 2021 do të jenë të hapura, ndërsa koalicionet parazgjedhore nuk do të jenë si në zgjedhjet e shkuara. Opozita tha se kjo është një maskaradë e kryeministrit për të vënë interesat personale mbi ato të shqiptarëve. Ndërsa ndërkombëtarët shprehën zhgënjimin dhe keqardhje, duke thënë se do të donin që ndryshimet kushtetuese të kishin dakordësinë e të gjitha palëve.