Vrasja e "Flor Qorrit" në Elbasan, dhëndri i Qazim Sejdinit: Pimë shumë dhe nuk e mbaj mend si nisi sherri, as pse e godita
Prokuroria kërkon arrest me burg për Sokol Sanxhaktarin, i dehur 0.7 g/ l Ekspertiza: 40- vjeçari u masakrua me këmbë karrigeje, vdiq nga çarja e aortës në parakrah dhe thyerja e kafkës
Një ditë pas vrasjes së Florian Lamçes të ndodhur në ambientet e lokal "Piazza", në qendër të qytetit të Elbasanit janë zbardhur detaje të reja në lidhje me ngjarjen e rëndë. "Gazeta Shqiptare" ka mundur të zbulojë shkakun e vdekjes së 40- vjeçarit Lamçe në orët e para të mëngjesit të 30 korrikut. Sipas ekspertizës mjeko- ligjore, ai ka humbur jetën gjatë sherrit me dy miqtë e tij, pas goditjes me mjete të forta. Mjeko- ligjorët sqarojnë se një goditje në kokë me një këmbë karrigeje i ka shkaktuar thyerje të kafkës si dhe çarje të aortës në parakrahun e majtë. Njëri prej të dyshuarve kryesore për vrasjen e tij është edhe dhëndri i ish- kryebashkiakut të Elbasanit Qazim Sejdini, Sokol Sanxhaktari. Ky i fundit, pas testit që i është bërë në policinë e qytetit ka rezultuar se në gjak kishte 0.7 gl/ l alkool, kur sipas ligjit nëse një person ka më shumë se 0,5 g/ l, konsiderohet i dehur. Gjithashtu, Sanxhaktarit do t'i bëhen edhe analizat e gjakut për të parë nëse ka qenë ose jo nën efektin e lëndëve narkotike. Rezultatet përputhen edhe me dëshminë që ky i fundit ka dhënë mëngjesin e djeshëm në polici, duke deklaruar se nuk mbante mend asgjë që i kishte ndodhur për shkak të konsumimit të alkoolit. Prokurori i çështjes, Kreshnik Ajazi ka kërkuar në gjykatë masën "Arrest me burg" për Sanxhaktarin, i cili është i akuzuari kryesor për vrasjen e 40- vjeçarit Lamçja. Ai bashkë me shokun e tij, Adriano Hajdarin u përfshinë në një sherr me mikun e tyre, 40- vjeçarin Florian Lamçe, i cili ndërroi jetë në vend. Dy të tjerët mbetën të plagosur dhe u dërguan fillimisht në spital dhe më pas u arrestuan nga policia, si të dyshuarit kryesorë lidhur me ngjarjen. Dy të arrestuarit tani do të përballen me drejtësinë me akuzën e vrasjes së kryer me dashje në bashkëpunim. Sa i përket viktimës, ai ka qenë i njohur për drejtësinë, pasi ka qenë dënuar me tre vite burg për pengim të zbardhjes së krimit, ndërsa është hetuar edhe për dy plagosje. Sakaq i vëllai i tij, Olti Lamce, është i dënuar me 24 vite burg për vrasje. Në vitin 2011 ai vrau pronarin e disko ' Tekiles', Almir Canin. Ndërkaq, "GSH" ka zbardhur dhe dëshminë
e dhëndrit të Qazim Sejdinit, Sokol Sanxhaktari.
DËSHMIA E SOKOL SANXHAKTARIT
Ai është marrë në pyetje mëngjesin e djeshëm, pasi më herët matjet e testit të alkoolit tregonin se ai ishte i dehur. Në dëshminë e tij, Sanxhaktari ka deklaruar para policisë se Florian Lamçen e kishte shok dhe se ishte takuar me të pasditen e 29 korrikut ku dhe kishin konsumuar pije alkoolike në disa lokale të ndryshme. Gjithashtu, ai pretendon se nuk mban mend asgjë dhe në momentin kur e ka marrë vesh lajmin e ndarjes nga jeta të Lamçes është shokuar. "Florin e kam shok. U takuam pasdite dhe kemi qenë në disa lokale. Në darkë u ulëm me Ardianon dhe me Florianin tek lokal "Piazza" dhe kemi pirë shumë pije të ndryshme. Nuk e kujtoj as si nisi debati dhe as pse me qëlloi dhe e qëllova. Jam i shokuar. Nuk e di si ka ndodhur. Ne jemi miq", mësohet të ketë thënë ai.
VRASJA
Tre shokët ndodheshin në ambientet e lokal "Piazza del sol", në qendër të Elbasanit. Florian Lamçja, ose siç njihet ndryshe në Elbasan me nofkën "Flor Qorri", Adriano Hajdari dhe Sokol Sanxhaktari, në shoqërinë e njëritjetrit kanë konsumuar pije alkoolike për gjatë gjithë natës. Një burim nga policia tha se ata mund të kenë konsumuar edhe lëndë narkotike, fakt ky i pakonfirmuar zyrtarisht. Në bisedë e sipër, rreth orës 04: 00 të mëngjesit ata janë zënë me njëri- tjetrin duke bërë që të përdorin shishet e birës dhe për pasojë kanë lënë të vdekur Florian Lamçjan. Për këtë ngjarje janë arrestuar Adriano Hajdari dhe Sokol Sanxhaktari, dhëndri i ish- kryetarit të Bashkisë së Elbasanit, Qazim Sejdinit. Dy të arrestuarit dhe vetë viktima Florian Lamçja konsiderohen si persona me
precedentë penalë në Elbasan.
KUSH ËSHTË
SOKOL SANXHAKTARI
Sokol Sanxhaktari, dhëndri i ish- kryebashkiakut Qazim Sejdini, është një personazh i njohur për drejtësinë. Ai është akuzuar se ka kryer një sërë veprash penale, por me sa duket, gjithmonë i ka shpëtuar drejtësisë. Ndërkohë Sanxhaktari njihet edhe si miku i afërt i Sokol Çelës, ky i fundit i akuzuar si i përfshirë në ngjarjen që ndodhi mesnatën e 18 shtatorit kur një automjet i blinduar tip "Audi A8" goditi makinën e patrullës së policisë, brenda të cilit ishte ish- zv. drejtori i policisë, Gjergji Oshafi. Po ashtu, mbetur vetëm në "thashethemet" mediatike dhe akuzat politike të opozitës shqiptare, dhëndri i Qazim Sejdinit, Sokol Sanxhaktari, dyshohet se është i përfshirë në grupin kriminal të bandës së Çelës. Ai është arrestuar disa herë, por gjithnjë ia ka dalë të rifitojë lirinë, duke i shpëtuar drejtësisë me dënime qesharake. Zakonisht ndodhte që viktimat të tërhiqeshin nga akuzat që ngrinin ndaj Sanxhaktarit, ose prokurori detyrohej të largohej nga çështja e hetimit, ose policia shpallej nga gjykata në tejkalim kompetencash, sepse kishte shoqëruar dhëndrin e kryetarit të bashkisë. Në janar të vitit 2016 Sokol Sanxhaktari i shkruan drejtuesit të prokurorisë Elbasan, Besnik Cani, që të zëvendësojë prokuroren e çështjes Erinda Lamkën. Në letrën e shkruar, 34- vjeçari aludonte se akuzat i ishin ngritur për shkak të lidhjes që ai kishte me ish- kryetarin e Bashkisë së Elbasanit. Sanxhaktari vijonte duke thënë se prokurorja e çështjes po kryente hetime tendencioze dhe keqdashëse ndaj tij, pasi Qazim Sejdini nuk kishte pranuar t'i punësonte bashkëshortin. Ngjarja për të cilën prokuroria ngriti akuza penale ndaj Sanxhaktarit kishte ndodhur mbrëmjen e 20 dhjetorit 2015. Salla operative e Policisë në Elbasan atë kohë është njoftuar se një person ndodhej i armatosur në ambientet e një lokali "LlotoSporti", ne lagjen "Luigj Gurakuqi" të qytetit të Elbasanit. Në vendngjarje, përveç patrullës, mbërrijnë edhe drejtues më të lartë të policisë së qarkut, të cilët personin e armatosur e identifikojnë si Sokol Sanxhaktarin.