Miliona lekë dëme dhe aktivitete pezull, arti në mëshirë të virusit
Zëvendësministrja Meri Kumbe: Jemi me 90% humbje!
Zëvendësministrja e Kulturës, Meri Kumbe, ndalet te humbjet që kanë shkaktuar për shkak të pezullimeve në art edhe kulturë dhe në sitet e trashëgimisë kulturore.
Në 6 muaj nga rreth 79 mln lekë të ardhura për 2019- ën, për 2020- ën janë rreth 11 mln lekë të ardhura, humbjet rreth 68 milionë lekë. "Në fakt, Ministria e Kulturës me të gjitha institucionet e varësisë që mbulon, është një nga ministritë që ka pësuar më thellë humbjen. Në terma financiarë humbja përllogaritet në rreth 90 për qind. Në trashëgiminë kulturore kemi një humbje në rreth 86 për qind, ku nga viti i kaluar, në 2019- ën regjistronim rreth 70 milionë e tetë qind mijë të ardhura, në 2020- ën kemi vetëm rreth nëntë milionë e tetëqind mijë. Në këtë kuptim diferenca është e ndjeshme, edhe kjo është një sfidë e madhe për institucionet, pasi një pjesë e këtyre fondeve shkonin për mirëmbajtjen. Në art statistikat janë më ndryshe, pasi përllogarisim një humbje përreth 67 për qind, në vitin 2019 kemi pasur të ardhura në 9 milionë e gjysmë, ndërsa në 2020- n për 6- mujorin e parë të vitit llogaritet rreth 3 milionë", saktësoi ajo me shifra. E pyetur nëse sezoni do të hapet në vjeshtë, ajo pothuaj ngriti supet teksa foli për protokolle e plane artistike "COVID", çka nënkupton aktivitete modeste, që zor se ia mbërrijnë të jenë të mirëdillta. Sipas Kumbes, sezoni i ri artistik këtë herë sytë i ka nga protokollet e udhëzimet e Ministrisë së Shëndetësisë. "Lidhur me vijimësinë e institucioneve të artit edhe të kulturës, në vjeshtë stafet e institucioneve përkatëse kanë ndërtuar protokollet në kuadër të pandemisë. Jemi dhe mbetemi në pritje të udhëzimeve të Ministrisë së Shëndetësisë, pasi prioritet ka shëndeti", tha Meri Kumbe. Zëvendësministrja e Kulturës theksoi se qasja digjitale ka qenë një mënyrë, për të sensibilizuar ndjekjen e aktiviteteve kulturore "online", ku nga 147 mijë e 800 e 28 spektatorë për vitin 2019 në opera dhe teatër, për shkak të mbylljes nga pandemia për 45 shfaqje "online" kanë arritur rreth katër milionë shikime.