“Do të ringremë ekonominë”, PD: 8 vite keqqeverisje, rilindja shkatërroi gjithçka

akuzojnë qeverinë se ka groposur ekonominë e vendit, duke favorizuar në njërën anë oligarkët dhe në anën tjetër duke rrënuar jetesën e shqiptarëve përmes rritjes së taksave. Ish- deputeti i PD- së, Florion Mima, bëri dje një skaner të 8 viteve që në pushtet është Edi Rama dhe rilindja. Mima shprehet se rilindja ka groposur gjithçka, duke shtuar se kur PD- ja të vijë në pushtet, do të ringrejë ekonominë e njerëzve me një qartësi kirurgjikale. “Në 8 vite, çoroditje, kaos, rrëmujë e gjullurdi totale për ekonominë reale, ekonominë që mban e ushqen shqiptarët dhe prodhon të mirat për arkën e përbashkët dhe … në të njëjtën kohë, qartësi e precizion kirurgjikal, trajtim princëror, plot favore e privilegje për veten e miqtë”, - shprehet z. Mima. Ai përmend se, “në fillim rrisin çmimin e energjisë për popullin, pastaj me radhë të gjitha taksat e tatimet. Ndalojnë fermerët të shesin majdanoz e rigon pa kasë, dhunojnë të mjerët që rrëmojnë për kanaçe në plehra, akuzojnë paraardhësit pa një dokument për gropë në financat publike dhe marrin ca qindra- milionë euro borxhe. Prezantojnë gjoba qindra- milionëshe për moslëshim kuponi, rrisin kontributet, por as nuk indeksojnë e jo më të rrisin pensionet. Heqin TVSH- në për biznesin e vogël me arsyetimin se do luftojë informalitetin, më pas e vendosin me arsyetimin se do luftojë informalitetin. Por, pastaj - shton Mima - e heqin prapë me arsyetimin se do luftojë informalitetin. Marrin prapë qindra- milionë euro borxhe, rrisin tatim fitimin por ulin atë mbi dividentin. Vendosin taksë qarkullimi shtesë në çmimin e naftës, por pastaj e kuptojnë që shtesa ka nevojë edhe për një shtesë tjetër që vendi të dalë numri një në botë për çmimin më të shtrenjtë të karburanteve. Ulin çmimin e blerjes së energjisë nga prodhuesit e vegjël, por pastaj bëhen pishman që e ulen aq pak dhe e ulin përsëri. Investitorëve të huaj u thyejnë këmbët me shkop bejsbolli dhe dalin në të njëjtën ditë e ftojnë të tjerë të investojnë në vendin e mundësive të mëdha, sigurisht, për t’i përzënë përsëri e për t’i dëmshpërblyer me qindra- milionë euro nga arka e përbashkët. Kërkojnë të prishin teatrin e ta ndërtojnë me koncesion, me arsyetimin se buxheti nuk ka para, por pastaj vendosin ta shembin e ta ndërtojnë vetë, me arsyetimin se kanë para; marrin përsëri miliarda euro borxhë për tërmetin e pandeminë, por prodhojnë vetëm shkarravina 3D, teksa ekonomia e vendit po jep shpirt në kthetrat e krizës…. Në anën tjetër - shprehet z. Mima - për veten e miqtë ulin çmimin e energjisë, ulin taksat e tatimet e për disa i heqin fare. Paratë e buxhetit bëhen ose koncesione e PPP, ose rilindje pllakash urbane, ose rrugë me 20 milionë euro/ km, ose autostrada blu ku 50 km kushtojnë 1.2 miliardë euro. Për vete e miqtë ka edhe amnisti fiskale, ka edhe legalizim drogërash; për popullin ka rritje të borxhit për t’u mbartur në shpinë, por edhe duar të stërgjatura të shtetit që hyjnë thellë e më thellë në xhepat e njerëzve”. Ish- deputeti i PD- së shtron pyetjen: “Si dilet nga kjo mynxyrë, ku edhe kaosi, edhe çoroditja duken si nxënës inoçentë përpara kësaj rrumpallhane qeveritare? Me një qeverisje normale, shërbëtore të njerëzve. Me një qeveri që del nga zgjedhjet e njerëzve dhe jo që paracaktohet nga çunat problematikë. Ky është parakushti, të tjerat kanë nevojë për llërë të përveshura dhe për të kundërtën e asaj që ka ndodhur në këto 8 vite: qartësi kirurgjikale për të sjellë ekonominë e njerëzve të thjeshtë në binarë, duke lënë gjullurdinë rrumpallhane të pleqërojë në dreqninë e vet, sigurisht, atje ku populli t’ia caktojë vendin e dreqnimit!”, - shprehet ish- deputeti i PD- së.