“20% e njerëzve do të rrezikojnë jetën nga COVID- i”, deputeti i opozitës së re: Larg panikut dhe lajmeve të rreme

Deputeti

i opozitës së re në Kuvend, Ralf Gjoni, njoftoi dje përmes një shënimi në “Facebook”, se pas dy javësh është shëruar nga infeksioni COVID19. Gjoni bën të ditur se tamponi që ka bërë mbrëmjen e djeshme ka rezultuar negativ, ndërsa thekson se për rreth 80% të njerëzve, frika nga ky virus është amplifikuar falë një vale histerie e lajmesh të rreme që qarkullojnë lart e poshtë. Teksa apelon qytetarët për kujdes maksimal, Gjoni tha se, “edhe pse shumica me shumë gjasa do e kalojnë lehtë, 20% e njerëzve do rrezikojnë jetën ose do përfundojnë me komplikacione”. “Kam kuptuar gjatë këtyre ditëve se për rreth 80% të njerëzve, frika nga ky virus është amplifikuar falë një vale histerie e lajmesh të rreme që qarkullojnë lart e poshtë. Ndaj larg panikut, larg lajmeve të rreme, por ama kujdes maksimal brenda kufijve të logjikës së shëndoshë njerëzore. Të rinjtë në veçanti po vazhdojnë të tregohen të pakujdesshëm dhe po refuzojnë të kuptojnë se COVID19 do disa ditë që të inkubohet në trup përpara se t’ua transmetojnë atë të moshuarve që kanë në shtëpi. Edhe pse shumica me shumë gjasa do e kalojnë lehtë, 20% e njerëzve do rrezikojnë jetën ose do përfundojnë me komplikacione. Dhe në kushtet e një vendi si Shqipëria me sistem shëndetësor modest, kujdesi ynë ndaj të tjerëve do ishte një ndihmë e madhe për ekipet mjekësore të tejngarkuara prej rasteve të rënduara nëpër spitale. Ripërsëris për të gjithë miqtë e mi: Mos frekuentoni ambiente të mbyllura publike pa maskë! Lani duart sa më shpesh. Evitoni në maksimum kontaktet fizike, veçanërisht me të moshuarit. Nëse ndjeni shenjën më të vogël si temperaturë e lehtë, dhimbje koke, gërricje fyti, ethe, frymëmarrje të vështirësuar, djersitje natën, dhimbje trupi, kollë, bllokim hundësh, humbje e nuhatjes/ shijes apo çdo shenjë tjetër gripale duhet të izoloheni menjëherë e të kërkoni kryerjen e tamponit”, - shprehet z. Gjoni.