“Një ditë do të ndodhte”, gjykata lë në burg vrasësin e nënës
Olsi Çekiçi, i papenduar: Vëllai më qëlloi i pari, unë vrava mamanë
Gjykata
e Shkallës së Parë në Pogradec dha ditën e djeshme masën e sigurisë “Arrest me burg” për 44- vjeçarin Olsi Çekiçi, i njohur ndryshe si “Lorja”. Seanca u zhvillua me dyer të mbyllura për shkak edhe të masave ndaj COVID- 19. Pas kësaj ngjarjeje makabre, Olsi Çekiçi është braktisur nga familjarët dhe të afërmit e tij dhe gjatë seancës së sotme në sallë nuk ka pasur familjarë të Olsi Çekiçit. Avokati mbrojtës i tij është Sokol Mihali, prokuror Gjergj Ceka, ndërsa gjyqtare Luljeta Kolonja. Sipas burimeve, 44- vjeçari ishte i qetë dhe nuk ka shprehur pendesë. Ai ka dhënë para gjykatës të njëjtat deklarime që dha edhe gjatë marrjes në pyetje nga policia pas arrestimit. Ai ka shpjeguar dinamikën e ngjarjes, duke pohuar autorësinë e vrasjes së nënës dhe plagosjes me mjete të forta të të vëllait, i cili kishte ndërhyrë për të shpëtuar të ëmën në momentin që 44vjeçari po i priste kokën. “Vëllai më goditi i pari, unë vrava nënën”, mësohet të ketë thënë në gjyq. Gjatë deklarimeve të tij të mëparshme, ai nuk ka shprehur pendesë duke thënë se kjo gjë “një ditë do të ndodhte”. Nga ana tjetër, burime konfidenciale bëjnë të ditur se nëna e vajzës dhe ish- bashkëshortja e Olsi Çekiçit, e cila momentalisht ndodhet në Itali kërkon të marrë kujdestarinë e vajzës së saj. E gjithë ngjarja ndodhi pas një konflikti babë- bijë për një aparat celular, sipas të afërmve të Olsi Çekiçit, 44- vjecari ka dashur të vrasë vajzën e tij, por ka ndërhyrë nëna, e cila ka mbetur e vdekur në vend. Në tentativë për ta shpëtuar ka ndërhyrë edhe vëllai i Çekiçit, por pavarësisht kësaj, ai nuk ka mundur ta shpëtojë nënën, duke përfunduar i lënduar edhe vetë në pjesë të ndryshme të kokës dhe trupit. Pas gjithë kësaj, 44vjecari i preu kokën nënës së tij dhe ia vari në portën e shtëpisë. Kanë qenë shërbimet e policisë, të cilët gjetën në vendin e ngjarjes Olsi Çekiçin së bashku me mjetin prerës ( drapër). Mësohet se gjatë arrestimit ai nuk ka bërë rezistencë, ndërsa fjalët e tij pas krimit sipas policisë ishin “gjaku është me magji”. Olsi Çekiçi vuan nga probleme të shëndetit mendor e gjithashtu është përdorues i lëndëve narkotike. Është një person me precedentë të mëparshëm penalë, i cili ka qenë i burgosur në Itali për drogë dhe më pas ka vuajtur dënimin në burgun e Zaharisë. Prokuroria i kërkoi gjykatës të caktojë për 44vjeçarin masën e sigurisë arrest me burg si dhe të vlerësonte të ligjshëm arrestin në flagrancë. Avokati i caktuar kundërshtoi kërkesën e prokurorisë, duke kërkuar që ndaj 44- vjeçarit të caktohej masa e sigurisë me afat 40 ditë, periudhë gjatë së cilës ai t’i nënshtrohej ekzaminimit psikik për shkak të çrregullimeve mendore. Pasi ka dëgjuar argumentet e prokurorit të çështjes dhe mbrojtësit, gjykata ka caktuar masën e sigurisë arrest me burg për Olsi Cekiçin, duke rrëzuar kërkesën e mbrojtësit, i cili nuk i paraqiti gjykatës asnjë provë shkresore që të vërtetonte se autori i krimit makabër vuante nga probleme të shëndetit mendor. Olsi Çekiçi njihet si person problematik në qytetin e
Pogradecit dhe shumë herë është denoncuar pasi ushtronte dhunë të vazhdueshme kundrejt nënës së tij, por ajo i ka tërhequr. Fqinjët e familjes thonë se kishin frikë të dilnin në rrugë për shkak të tij, sepse dihej që ishte me probleme mendore. Në Psikiatrinë e Elbasanit, 44vjeçari kishte një kartelë mjekësore, por sipas mjekut, ai nuk pranonte të merrte mjekim. Olsi Çekiçi gjithashtu ishte përdorues i lëndëve narkotike dhe i dënuar në më parë për drogë në Itali, Belgjikë e Greqi dhe ka vuajtur dënimin në burgun e Zaharisë në vend.