Meta dekreton ligjin për “Për regjistrin e pronarëve përfitues”: Ka rëndësi themelore
Presidenti: Të mos zvarritet, por të zbatohet menjëherë
Presidenti
Ilir Meta dekretoi dje me shpallje ligjin nr. 112/ 2020 “Për regjistrin e pronarëve përfitues”. Për Presidentin Meta, ky ligj është me rëndësi themeltare për Shqipërinë dhe duhet të nisë menjëherë zbatimi i tij dhe transparenca me zotëruesit e aksioneve, pa u zvarritur nga Këshilli i Ministrave, nxjerrja e akteve nënligjore që mundësojnë fillimin e implementimit. Kreu i shtetit argumenton se ky ligj ka rëndësi themelore për Shqipërinë, duke shtuar se duhet që të nisë menjëherë zbatimi i tij, pa u zvarritur nga Këshilli i Ministrave nxjerrja e akteve nënligjore që mundësojnë fillimin e implementimit. “Presidenti i Republikës, Sh. T. Z Ilir Meta, ka dekretuar me shpallje ligjin nr. 112/ 2020 ‘ Për regjistrin e pronarëve përfitues’. Ky ligj është një rekomandim i përsëritur për Republikën e Shqipërisë nga Komiteti i Ekspertëve për Vlerësimin e Masave Kundër Pastrimit të Parave dhe Financimit të Terrorizmit ( MONEYVAL) të Këshillit të Europës, për identifikimin dhe regjistrimin e pronarit përfitues të subjekteve tregtare dhe organizatave jofitimprurëse, të regjistruara në Republikën e Shqipërisë. Ky ligj është një hap para drejt transparencës së zotëruesve të kapitalit të subjekteve tregtare, por që po në funksion të kësaj transparence, mund të kishte përcaktuar edhe më qartë detyrimin për deklarimin dhe regjistrimin e subjekteve, pa kufizime, në raport me aksionet/ kuotat të kapitalit ose të interesave të pronësisë në një subjekt raportues. Ky ligj nuk duhet të jetë një akt që miratohet vetëm për qëllime raportimi pranë ‘ Moneyval’, por është me rëndësi themeltare për Shqipërinë, të nisë menjëherë zbatimi i tij dhe transparenca me zotëruesit e aksioneve, pa u zvarritur nga Këshilli i Ministrave nxjerrja e akteve nënligjore që mundësojnë fillimin e implementimit”, - thuhet në njoftimin e Presidencës.