Nëntë ditë izolim për shkak të COVID- 19, këshilltari tregon për gjendjen e kryeministrit Hoti: Vetëm pak kollë e lodhje
Prej nëntë ditësh kryeministri i Kosovës, Avdullah Hoti, gjendet në izolim pasi ka rezultuar pozitiv me COVID- 19. Për gjendjen shëndetësore të Hotit ka dhënë detaje këshilltari i tij për media, Xhavit Beqiri. Sipas tij, gjendja e kryeministrit është e mirë. Beqiri ka treguar për “Gazetën Express” edhe për takimet virtuale që ka zhvilluar sot shefi i ekzekutivit. “Mirë është, siç e keni parë, tërë ditën e ka pasur aktive me takime virtuale nga banesa e tij. Ka pasur më herët takim me krerët e sigurisë, po ashtu me kryetarët e komunave dhe drejtorët e departamenteve komunale për shëndetësi, pastaj një takim tjetër me kryetarët e komunave dhe drejtorët komunalë për arsim. Në këto dy takime kanë qenë të pranishëm edhe dy ministrat përkatës, ku është diskutuar për opsionet për fillimin e vitit shkollor”, ka thënë Beqiri. Ai shprehet se përveç kollës dhe lodhjes, Hoti nuk ka simptoma të tjera. “Ai do të kalojë atë 14ditëshin, pra do t’i përmbahet protokollit, më pas kur të dalë negativë, do t’i kthehet punës. Kemi biseduar vazhdimisht dhe nuk ka simptoma të tjera, pak një lodhje të lehtë, por përveç kollës, nuk ka ndonjë simptomë tjetër. Këto ditët e fundit sidomos sot i ka pasur plot me angazhime”, ka deklaruar këshilltari i Hotit. Përveç kryeministrit, për COVID19 janë testuar edhe gjashtë anëtarë të kabinetit të tij, derisa pjesa tjetër e stafit është izoluar për gati tetë ditë. Në mesin e atyre që janë izoluar ka qenë edhe vetë Beqiri. Ai ka treguar se dje ka dal nga izolimi. “Prej stafit të kryeministrit janë testuar gjashtë anëtarë të kabinetit, të cilët kanë pas kontakt me intensiv, por të gjithë kanë dalë negativë, ndërsa ne pjesa tjetër kemi qenë për 7- 8 ditë në vetizolim dhe kur nuk kemi pasur asnjë lloj simptome. Kemi filluar të dalim në zyrë. Unë për vete kam dal sot 9dje), meqenëse e kemi marrë konfirmimin që mund të dalim”, ka thënë Beqiri. Hoti ka njoftuar se është infektuar me koronavirus më 2 gusht. Ai ka bërë me dije se përveç kollës, nuk ka simptoma të tjera dhe se do të jetë në izolim për dy javë.