Shifra të larta nga Kosova, 13 pacientë humbën jetën, 171 raste të reja me COVID- 19 në 24 orët e fundit

Kosovës të martën i janë shtuar 171 raste të reja me koronavirus, pas marrjes së 463 mostrave. Instituti Kombëtar i Shëndetit Publik ( IKSHPK) ka njoftuar se brenda 24 orëve janë regjistruar edhe 13 viktima, duke e çuar në total 354 numrin e të vdekurve me koronavirus në Kosovë. Sipas të dhënave të këtij instituti, të martën janë regjistruar edhe 190 raste që kanë mposhtur virusin, ndërsa raste aktive aktualisht janë 3.988. Prej 13 marsit, kur janë regjistruar rastet e para me koronavirus në Kosovë, autoritetet shëndetësore kanë raportuar për 10,590 të prekur me COVID- 19. Disa laboratorë në Prishtinë, të licencuar për teste serologjike për koronavirus, kanë nisur punën duke njoftuar se çmimet variojnë nga 25 deri në 50 euro, varësisht nga numri i testeve për antitrupa. Çmimet për teste serologjike në Kosovë dallojnë nga laboratori në laborator. Në vendet e rajonit, çmimet për testimin serologjik në disa institucione private shëndetësore janë nga 17 deri 32 euro. Në Shqipëri, testimi serologjik kushton 32 euro. Në Serbi dhe Mal të Zi, ky lloj testimi kushton 17 euro, ndërsa në Maqedoni të Veriut ky testim kushton 20 euro. Testet serologjike janë ato teste në bazë të të cilave mund të vërtetohet nëse një person e ka pasur koronavirusin dhe bëhet përmes mostrave të gjakut. Ndërkaq, dy nga institucionet shëndetësore të licencuara në Kosovë për testim me metodën PCR dhe teste serologjike për koronavirus ende nuk kanë filluar t’i bëjnë këto teste dhe nuk e dinë sesa do të jenë çmimet.