Miliardat e KE- së, Rama: Paratë që jep bota nuk vijnë këtu me kanoe, janë 7 dete në mes

Komisioni Europian synon që, gjatë dekadës së ardhshme, të investojë deri në 20 miliardë euro në Ballkanin Perëndimor, thuhet në një plan investimi që ka parë "Radio Evropa e Lirë". Draft- dokumenti thekson se prioritet do të jenë lidhjet më të mira të ekonomive të Ballkanit Perëndimor, brenda rajonit, por edhe me Bashkimin Evropian. Kryeministri Edi Rama deklaroi se ky investim është hapur falë vizionit të Shengenit Rajonal, por shtoi se për t'i marrë këto investime duhet një rrugë e gjatë. "Kur i dëgjoni këto miliarda, kini parasysh se mes nesh dhe atyre ka 7 dete. Janë, por kanë procese nga më të ndryshmet. Ne po mbarojmë shkollat me buxhetin e shtetit, me paratë tona e kursimet tona për të adresuar një problem që nuk e krijuam ne. Paratë që jep bota nuk vijnë këtu me thes, as me valixhe dhe as me kanoe. Paratë që jep bota vijnë me procedura që jep vetë. I bëjnë vetë studimet. Caktojnë vetë tenderat, i supervizojnë vetë. Dhe kohën e kanë në dorë ata, jo ne", - deklaroi z. Rama. Po dje, pas mbledhjes me drejtuesit politikë në selinë e PS- së, kryeministri Edi Rama komentoi për gazetarët progres- raportin e KE- së për negociatat për Shqipërinë. "Më vjen mirë që progres- raporti është një pasqyrë krejt e ndryshme nga pasqyra që përpiqen çdo ditë t'u vënë përpara shqiptarëve ata që flasin në emër të Evropës dhe janë të etur për pushtet. Më vjen mirë edhe që deklarata e BE- së lidhur me reformën zgjedhore ishte krejt e kundërta nga çfarë u tha dhe u predikua duke paralajmëruar re të zeza mbi Shqipërinë, duke hedhur një helm dhe një tym që ' ta kapë kush ta kapë' dhe ' të çoroditet kush të çoroditet' dhe ' të humbasë rrugën kush të humbasë rrugën' ata që duan t'i çojnë njerëzit në një rrugë qorre", - deklaroi z. Rama.