Miratohen ndryshimet në ligjin për Policinë e Shtetit, Lleshaj: Përgjimet ambientale kërkohen vetëm nga komisarët
Përplasje në Komisionin e Ligjeve, ‘ nxehet’ Manja: Si s’e mësove mor burrë këtë votim “Policët mund të ‘ zhvishen’ nga statusi i policit për t’u punësuar si civilë”
Komisioni i Ligjeve ka miratuar ditën e djeshme, me 13 vota pro dhe 1 kundër, ndryshimet në ligjin për Policinë e Shtetit. Me ndryshimet e reja ministri i Brendshëm, Sandër Lleshaj sqaroi se përgjime ambientale do të kërkojnë vetëm komisarët.
“Keni draftin e vjetër që tashmë tek i riu nuk figuron më. Ligji aktualisht sot siç është në përgjithësi flet për përgjim ambiental. Ligji i ri është ndryshim tërësor. Nuk flet më për përgjim. Është superrregulluar dhe është modifikuar në ekstremin e mundshëm. Vetëm komisarët mund të kërkojnë përgjim ambiental. Përgjimet ambientale nuk janë përdorur nga policia”, - tha Lleshaj. Po kështu, punonjësit e policisë do kenë mundësi të ngrihen në detyra shtetërore, me kushtin për të hequr dorë nga statusi i policit, për t’u punësuar si civilë.
“Iniciativa për të hapur një mundësi transferimi nuk ka të bëjë me ndëshkimin. Ne besojmë që kjo do bëhet përmes rregullimit me vendim të qeverisë. Ne mund ta vendosim veten në kushte fantazie për të parë se çfarë mund të shkojë keq. Ligji i sotëm për Policinë e Shtetit ka një nen që shumë pak e dinë, neni që përcakton statusin e Policisë së Shtetit. Aty thotë ‘ punonjësi i Policisë së Shtetit gëzon statusin e nëpunësit civil’. Nuk është ushtarak. Nuk është se do të ketë humbje ose rrezikim nga ky nen”, - shtoi Lleshaj.
Ndërkaq, ministri i Brendshëm, Sandër Lleshaj në Komisionin e Ligjeve ka thënë se të gjithë punonjësit e policisë që janë në një moshë të thyer, do të zhvendosen nëpër shkolla si punonjës sigurie. “Kemi shumë punonjës që janë të vjetër në moshë dhe shërbejnë në ruajtjen e objekteve. E dimë se kemi pasur incidente në shkolla. Ndaj ata do të kalojnë në ruajtjen e këtyre objekteve”, - u shpreh ministri.
Ky vendim është marrë pas incidenteve të ndodhura së fundmi në shkolla.
PERPLASJA
Mbledhja në Komisionin e Ligjeve, ku u miratuan me 13 vota pro dhe 1 kundër ndryshimet në ligjin për Policinë e Shtetit, ka pasur një përplasje mes deputetit Adriatik Alimadhi dhe drejtuesit të komisionit Ulsi Manja. Në momentin që Manja ka qenë duke bërë procedurën e votimit, është nxehur nga ndërprerja e Alimadhit. Në fakt kjo nuk është hera e parë, pasi edhe në mbledhjet e tjera të Komisionit, Alimadhi ka ndërhyrë duke krijuar përplasje mes tyre.
PJESË NGA DEBATI:
Manja: Po një sekondë, se s’kam mbaru votimin mor burrë, si s’e mësuat këtë votim. Unë në votim, ky më thotë... Zoti Alimadhi, të lutem mor 1 sekondë, nuk do e shpjegoni. Të mbaroj unë e do merrni fjalën. Atëherë votohet me 13 pro, 1 kundër.
Alimadhi: Kam një vërejtje! Mos u nxehni, se kjo është detyra jonë! Mos u nxeh, se s’ka ndonjë problem kaq të madh. Mos bërtisni, jam njeri i zakonshëm. Manja: Po ti mor zoti Alimadhi më ndërpret në mes të votimit...
POLICET, ROJE NE SHKOLLA
Ministri i Brendshëm, Sandër Lleshaj në Komisionin e Ligjeve ka thënë se të gjithë punonjësit e policisë që janë në një moshë të thyer, do të zhvendosen nëpër shkolla si punonjës sigurie. “Kemi shumë punonjës që janë të vjetër në moshë dhe shërbejnë në ruajtjen e objekteve. E dimë se kemi pasur incidente në shkolla. Ndaj ata do të kalojnë në ruajtjen e këtyre objekteve”, - tha ministri. Ky vendim është marrë pas incidenteve të ndodhura së fundmi në shkolla.