Gara brenda PD- së, guri i provës që demokratët e kaluan me sukses
... kështu edhe modelin më të mirë të mundshëm, të aplikuar deri më sot në realitetin politik pluralist shqiptar, për përzgjedhjen e kandidatëve që do të garojnë në zgjedhjet politike dhe ato vendore. Ky model i demokracisë direkte brenda partisë u sugjerua nga aleatët tanë, Kristian- Demokratët Gjermanë ( CDU), Konservatorët Britanikë ( CP) dhe Republikanët Amerikanë ( IRI), me idenë, por edhe me tolerancën që, duke u aplikuar për herë të parë në ambientin shqiptar, mund të shfaqte edhe mangësi, probleme, vështirësi apo risqe të ndryshme, të cilat do të përmirësoheshin, me qëllim përsosjen e modelit në fushatat e ardhshme elektorale. Fushata e propozimeve dhe përzgjedhjes së kandidatëve, që filloi më 25 qershor dhe që përbënte, pa dyshim, një risi jo vetëm për PD- në por edhe për politikën shqiptare, po shkon drejt fundit, dhe natyrisht tani është më e lehtë për të bërë analizën dhe bilancin e kësaj fushate. Duke qenë i deleguar për të ndjekur fushatën e propozimeve në qarkun e Durrësit, dhe pjesërisht në atë të Tiranës, kam konstatuar me kënaqësi që gjithçka ka qenë e lirë, e ndershme, demokratike dhe transparente. Ka pasur pjesëmarrje, përgjegjësi dhe interesim të jashtëzakonshëm nga demokratët, shoqëruar kjo edhe me propozime tepër dinjitoze, përfaqësuese, kontribuuese, konkurruese dhe elitare. Po ashtu, edhe procesi i votimit të kandidatëve ka qenë një proces i rregullt, i lirë dhe demokratik. Natyrisht që, në një proces ku nga 3700 kandidatë do të mbeten 140 në finale, mund të ketë edhe hatërmbetje, gjë më se normale, pasi kjo është pjesë e natyrës njerëzore, por më e rëndësishmja është që të 3700 kandidatët do të jenë faktor kyç dhe i rëndësishëm i fitores sonë. Kjo fushatë brenda PD- së, fillim e mbarim ka pasur pozitivitete, qytetari, demokraci, duke sjellë edhe një bashkim, unifikim, forcim dhe rivitalizim të PD- së në këtë prag fushate elektorale. Natyrisht që, s'është as vendi, as koha dhe as vëmendja ime që të krahasoj fushatën brenda PD- së me atë që ndodh në kampin tjetër, ku ka vite e vite që nuk zhvillohen zgjedhje, as votime, ku nuk funksionin asnjë lloj forumi, nuk respektohet asnjë lloj norme demokratike, ku grupi parlamentar, qeveria dhe të gjithë përfaqësuesit e Rilindjes i shërbejnë qorrazi 1- shit dhe të gjithë janë katandisur si kukullat ruse matrioshka të "Liderit Global", "Skënderbeut të Elizës" apo imitacionit digjital të "Ismail Qemalit". Demokratët kanë 8 vite në opozitë, vite shumë të vështira këto, ku të gjithë kanë një kontribut të jashtëzakonshëm në mbrojtjen e lirisë, demokracisë dhe vlerave të qytetarisë kundër barbarisë së pushtetit të Rilindjes, dhe të gjithë duhen respektuar për qëndresën e tyre. Kryesia e PDSH- së, Grupi Parlamentar, Këshilli Kombëtar, 3700 kandidatët, anëtarësia e PD- së, militantët, simpatizantët, të gjithë së bashku me popullin opozitar duhet të bashkohemi për të rrëzuar nga pushteti këtë bandë kriminale, që çdo ditë e më shumë po e varfëron dhe shkatërron vendin tonë, po vret të ardhmen e fëmijëve tonë. Të gjithë kemi nevojë për njëri- tjetrin për të fituar betejën e 25 prillit me të keqen më të madhe që ka pllakosur kombin tonë që prej 30 vitesh, dhe do ta fitojmë këtë betejë, pasi kemi me vete shumicën dërrmuese të qytetarëve shqiptarë!