Kufiri detar, ministri i Jashtëm grek: Zgjidhja, e rëndësishme për integrimin
Ministri i Jashtëm në detyrë i Greqisë, Nikos Dendias komentoi dje ecurinë e bisedimeve me Shqipërinë, lidhur me çështjen e kufirit detar. Në një intervistë për mediat greke, kryediplomati grek deklaroi se dëshiron që të zgjidhen sa më shpejt çështjet e prapambetura me Shqipërinë. Mes të tjerash, ministri Dendias theksoi se me Shqipërinë ishte nënshkruar marrëveshja e vitit 2009, por që sipas tij, nuk pati zhvillim për arsye të njohura. "Është zgjedhje e Greqisë përcaktimi i shelfit kontinental dhe ZEE të bazohet në të drejtën ndërkombëtare, me të gjitha vendet fqinje. Kështu dëshirojmë edhe me Shqipërinë, ta zgjidhim këtë çështje të prapambetur sa më shpejt të jetë e mundur. Siç deklarova pak kohë më parë në Parlament, në debatin për ratifikimin e marrëveshjeve të demarkacionit detar me Italinë dhe Egjiptin, shpresoj që hapi tjetër të jetë nënshkrimi i një marrëveshjeje me Shqipërinë. Më lejoni t'ju kujtoj se ne kishim nënshkruar një marrëveshje në 2009, por që nuk pati zhvillim për arsyet e njohura. Shpresoj që së shpejti të mundemi të rikapim sërish fillin e bisedimeve përkatëse dhe të arrijmë në rezultate të kënaqshme për të dyja palët. Është e rëndësishme, në kontekstin e marrëdhënieve të fqinjësisë së mirë dhe duke marrë parasysh perspektivën evropiane të vendit tonë fqinj, të mbyllen të gjitha çështjet e hapura, pasi kjo automatikisht do të drejtojë në një azhurnim të marrëdhënieve tona dypalëshe dhe do të jetë në të mirën e të gjithëve", - është shprehur ministri grek.