PD mbyll votimin e kandidatëve, hapat e mëtejshëm drejt 25 prillit
Anëtarësia përjashtoi me votë ish- deputetë, ndërkohë që votoi emra të rinj në listë Komisioni do të analizojë votën për çdo emër dhe do t'i bashkëngjisë një raport të shkruar
Partia Demokratike ka përmbyllur tashmë fazën e konsultimit me anëtarët të emrave për deputetë dhe kryetarë bashkie. Procesi ishte një risi për politikën, ndaj dhe rezultoi një garë e vërtetë mes aspirantëve dhe një votë me peshë e anëtarësisë. Disa figura të rëndësishme në nivel vendor dhe qendror u përjashtuan. Në qarkun e Kukësit, dy kryebashkiakë morën votë negative nga anëtarët e Partisë Demokratike, duke u lënë jashtë procesit. Edhe demokratët e Beratit përjashtuan ish- deputetin Astrit Veliaj, duke i dhënë fund mundësisë që ai t'i përfaqësojë në Kuvend. Garë e fortë u zhvillua edhe në qarkun e Korçës, ku demokratët e Devollit përjashtuan ish- deputetin Hekuran Hoxholli. Ndërsa në Pogradec u përjashtuan nga gara ish- kryetari i Bashkisë, Eduart Kapri dhe ish- deputeti Klevis Balliu. Ky proces, përveç peshës që i dha anëtarësisë duke u shprehur me votë për emrin që do i përfaqësojë, Partisë Demokratike i shërbeu si hapje drejt emrave të rinj, të cilët vijnë nga shoqëria civile, media, sporti apo arti. Thuajse në gjithë degët e partisë, demokratët propozuan dhe mbështetën emra të rinj, duke ia dërguar Partisë Demokratike për vendimmarrje finale. Me konsultimin në anëtarësi, rreth 400 emra në gjithë degët do t'i rikthehen sërish Komisionit të Verifikimit të kandidatëve të ngritur në Partinë Demokratike. Ky Komision do të analizojë votën për çdo emër dhe do t'i bashkëngjisë një raport të shkruar.
LISTA
Lista përfundimtare me emrat me të cilët do të garojë Partia Demokratike, do t'i paraqitet Kryesisë për miratim. Tirana ishte qarku i fundit që kurorëzoi këtë garë.
Deda, apo ish- futbollisti Andi Lila, i cili është pjesë e listës së kandidatëve në degën e Kavajës. Me përmbylljen e votimit, lista do t'i kalojë Komisionit të Vlerësimit, i cili do të bëjë seleksionimin final, për t'i kaluar më pas emrat për votim në Kryesinë dhe Këshillin Kombëtar të Partisë Demokratike. Krahas anëtarësisë, që ka të drejtën e 80% të propozimeve, 20% e tyre do të vijnë nga Kryesia. Për kreun e demokratëve, Lulzim Basha, i cili votoi ditën e shtunë në Njësinë nr. 8, ky proces është parathënie e asaj që do të vijë pas 25 prillit. "Kjo është një garë dhe një festë demokracie brenda Partisë Demokratike", - tha z. Basha. Nga procesi i nisur në PD, qenë jo të paktë emrat e ish- kryetarëve të bashkive apo edhe ish- deputetëve që u skualifikuan nga anëtarësia, mes të cilëve edhe ai i Klevis Balliut. "Ky është një proces në të cilin vendos anëtarësia. Mbi votën e anëtarësisë nuk ka asgjë. Por ky nuk është një proces ku ka të përjashtuar. Ky është një proces ku nuk ka të humbur. Pa diskutim, nga 3.600 propozime, mund të themi që shumica dërrmuese e tyre posedojnë kualitetet e përfaqësimit politik. Ju e dini fare mirë që s'ka parlament në botë që të ketë 3.600 deputetë", - theksoi z. Basha. Ironisë së kryeministrit për një proces farsë në radhët e demokratëve, Lulzim Basha iu kundërpërgjigj duke i kujtuar asamblenë e së shtunës. "Mos prisni ju që ai të lavdërojë një proces demokratik. Për 22 vite, karriera e tij është ngritur mbi parime antidemokratike, për 22 vite refuzon t'u bindet rregullave të garës. Nuk organizon gara në PS, i ka harruar zgjedhjet. Dje u zhvillua një aktivitet dhe një fjalim treorësh vetëm për të justifikuar mbajtjen në Kryesi të njerëzve që janë në listën e DASH, si Vangjush Dako", - deklaroi z. Basha.