Korrupsioni, Gjonaj: Po luftojmë fenomenet negative. Yuri Kim: Dua duartrokitje për ministren

Ministrja e Drejtësisë Etilda Gjonaj, në fjalën e mbajtur dje në Konferencën e Lartë Antikorrupsion, deklaroi se po punohet në luftimin e fenomeneve negative në sistemin e drejtësisë. Gjonaj theksoi se punohet sidomos në problematikat që kanë vërejtur organizatat ndërkombëtare, duke shtuar se aleati kryesor i ministrisë që ajo drejton është qytetari. "Kemi parë të gjitha çështjet e perceptimit të korrupsionit nga ana e qytetarëve dhe e Amnisty International. Aleati ynë kryesor është qytetari. Ne duam të fitojmë besimin e qytetarëve me vullnet ndaj luftës ndaj korrupsionit. Qytetarët marrin shërbime online të e- albania, duke shmangur sportelet dhe veprimeve korruptive në këto sportele. Shoqëria civile na ka mbështetur me ekspertizë. Dua të falënderoj të gjithë bashkëpunëtorët ndërkombëtarë",- u shpreh Gjonaj. Ministrja përmendi se gjithashtu, në raportin e tij GRECO ka vlerësuar pozitivisht arritjet në kuadër të reformës në drejtësi, veçanërisht në drejtim të ngritjes së një sistemi gjyqësor të bazuar në integritet dhe përgjegjshmëri, me qëllim parandalimin e korrupsionit tek gjyqtarët dhe prokurorët. Pas fjalës së saj, reagoi ambasadorja Yuri Kim: "Duhet pohuar lidershipi i jashtëzakonshëm i ministres së Drejtësisë, Etilda Gjonaj dhe stafit të saj që e kanë mundësuar këtë. Ju Ministre keni një nga punët më të vështira në të gjithë Shqipërinë, por ju keni qenë këmbëngulëse duke vendosur hap pas hapi, këmbë pas këmbe drejt ngjitjes suaj në mal dhe dëshiroj që t'i japim një duartrokitje Ministres Gjonaj dhe të gjithë personelit të saj për punën e bërë".