Gratë i futen biznesit të kanabisit, pas Vlorës, kapen dy në Fier
Zbulohet punishtja e përpunimit, sekuestrohen 100 kg, në pranga organizatori dhe një tjetër
FIER - Duket se gratë i janë futur biznesit të kanabisit për të siguruar jetesën. Pas Vlorës, ku u arrestuan 4 gra në moshë, 2 më të reja janë arrestuar në Fier, ku është zbuluar një punishte përpunimi kanabisi.
Policia e Fierit deklaron zyrtarisht, se në vijim të punës për goditjen e veprimtarisë kriminale në fushën e narkotikëve, specialistët e Seksionit për Hetimin e Trafiqeve të Paligjshme dhe Narkotikëve në DVP Fier, pas informacioneve të marra në rrugë policore dhe një hetimi disajavor, kanë bërë të mundur finalizimin me sukses të operacionit policor antidrogë të koduar "Hamili", në kuadër të të cilit u bë kapja dhe arrestimi në flagrancë i shtetasve:
R. ( D). B., 57 vjeç, banues në Hamil, Fier ( organizatori i kësaj veprimtarie kriminale).
S. K., 38 vjeç, E. K., 33 vjeçe, E. K., 31 vjeçe, banuese në Ndërmenas, Fier.
Gjithashtu u procedua penalisht dhe një shtetase tjetër.
Shërbimet e Policisë, në bazë të hetimeve të kryera dhe informacionit të grumbulluar kanë ushtruar kontroll në banesën e shtetasit R.( D). B, në fshatin Hamil, ku kanë kapur dhe arrestuar në flagrancë shtetasit e lartpërmendur.
Gjatë kontrollit të kryer në banesë, shërbimet e Policisë gjetën dhe sekuestruan në cilësinë e provës materiale 100 kg lëndë narkotike të dyshuar kanabis sativa në proces tharjeje, 1 automatik me 2 krehra dhe 310 fishekë, 2 freskuese që shërbenin për tharjen e bimëve narkotike, 1 presë metalike që shërbente për presimin dhe paketim e lëndës narkotike, 7 palë gërshërë, 1 motoçikletë me targa të falsifikuara e trafikuar nga jashtë vendit, 4 aparate celularë, si dhe disa bimë të dyshuara narkotike, të kultivuara në ambientin përreth banesës së 57- vjeçarit.
Materialet procedurale i kaluan Prokurorisë pranë Gjykatës së Shkallës së Parë Fier, për veprat penale "Prodhimi dhe shitja e lëndëve narkotike", "Kultivimi i bimëve narkotike", "Mbajtja pa leje e armëve dhe e municionit luftarak" dhe "Trafikimi i mjeteve motorike".