“Rama po shkatërron integrimin e diplomacisë”, Shehu: Shqiptarët ta ndëshkojnë në 25 prill

Për ish- ministrin e Jashtëm, Tritan Shehu, Rama po shkatërron integrimin e diplomacisë shqiptare. Në një status në “Facebook”, Shehu rendit katër elementë, që sipas tij tregojnë dëmtimin që kryeministri po i bën integrimit të vendit. “Kryeministri- ministër i Jashtëm po shkatërron integrimin e diplomacinë shqiptare. Së pari të publikosh bisedat informale me Macron nuk mendoj se është thjesht një gafë e rëndë diplomatike, por tingëllon si një provokacion, që dëmton marrëdhëniet me atë personalitet, me atë vend mik dhe shton pengesat qoftë dhe aty për integrimin tonë. Së dyti, të sulmosh BE- në në politikat e saj të integrimit, ta akuzosh atë me epitete krejt jashtë etikës diplomatike, janë përsëri jo thjesht humbje ‘ ekuilibri’, por insulte me pasojë negative politike për ne. Së treti, të akuzosh pa baza Brukselin dhe vendet anëtare, të kërkosh të fshehësh mbas të tilla akuzave përgjegjësitë e tua për problemet që po kalon Shqipëria, që nga deformimi i thellë i demokracisë, shkatërrimi i institucioneve, përfshi dhe të drejtësisë, korrupsioni, krimi galopant, Republikën e kanabisit të krijuar, trafiqet, varfërinë, emigracionin masiv etj., është si të kërkosh të fshehësh ‘ minaren në trajse’, gjë që tregon se nuk po mendon për të korrigjuar sadopak, përkundrazi. Së katërti, të mos kuptosh qartë veçanërisht tani që Maqedonisë së Veriut i është çelur ‘ drita jeshile’, ndërsa neve, një vend historikisht i lidhur me Perëndimin e pa ato probleme të fqinjit, konsiderohemi si “delja e zezë”, tregon se nuk do ta kuptosh këtë realitet të rëndë të krijuar nga kjo qeverisje, për arsye të lidhura me vullnete, interesa e strategji të qëllimshme për të penguar integrimin e vendit e mbajtur atë nën këto pushtete okulte, larg Perëndimit e BE- së, të lidhura këto me detyrime të imponuara, apo të dyja bashkë, për vazhdimin e kësaj rruge pa krye”, - shprehet z. Shehu.