Vrasje dhe vepra terroriste, OFL iu dërgon formularin për deklarimin e pasurisë 2 të dënuarve në Mirditë dhe 1 në Lezhë

TIRANË-

Operacioni Forca e Ligjit është intensi fikuar tashmë teksa dje është ndalur në 2 qytete duke u dërguar formularin e vetdeklarimit 3 të dënuarve më parë. Në Mirditë, OFL u kërkon të deklarojnë pasurinë dy të dënuarve për vrasje si dhe një tjetri në Lezhë të dënuar për vepra me qëllime terroriste nëpërmjet shkaktimit të ndërprerjes së energjisë elektrike. Ata janë Andre Nikolli, Besnik Lekgegaj, Besmir Lugina.

NJOFTIMI I POLICISË

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

Andre Nikolli, banues në Rubik, Mirditë, i dënuar për veprën penale "Vrasja me paramendim", kryer në bashkëpunim;

Besnik Lekgegaj, banues në Perlat, Mirditë, i dënuar për veprën penale "Vrasja me paramendim";

Besmir Lugina, banues në Lezhë, i dënuar për "Vepra me qëllime terroriste nëpërmjet shkaktimit të ndërprerjes së energjisë elektrike", mbetur në tentativë, kryer në bashkëpunim.

Këta individë, si subjekt i Ligjit Special, duhet t'iu përgjigjen me shkrim, brenda 48 orësh, të gjitha pyetjeve të OFL- së dhe më pas, përgjigjet e marra do t'i dërgohen SPAK- ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.