Rama paralajmëron një mbyllje të dytë: Mund ta shmangim nëse respektojmë masat
Platforma "Akademi. al"/ Kushi: Krijon mundësinë për mësim online për nxënës nga 3 deri 18 vjeç "Një tjetër izolim do të ketë pasoja më të rënda se i pari"
Kryeministri Edi Rama ka parala jmëruar një mbyllje të dytë nga koronavirusi, nëse qytetarët nuk bëhen të gjithë të vetëdijshëm e të respektojnë masat. Nga Lezha, ku shpërndau tableta digjitale për nxënësit në klasa kolektive, kreu i qeverisë deklaroi se një tjetër mbyllje do të kishte pasoja shumë më të mëdha se izolimi i parë për të gjitha kategoritë. "Është momenti të bëhemi të gjithë të vetëdijshëm se çfarë rreziku po kalojmë. Rreziku që po kalojmë është që të na duhet të mbyllemi përsëri; një mbyllje përsëri do ishte shumë herë më problem dhe me shumë më tepër pasoja se mbyllja e parë, në të gjitha aspektet, për të gjitha kategoritë. Ne mund ta shmangim duke mos shmangur atë që duhet të bëjmë në të përditshmen tonë, duke mos shmangur bezdinë jo të vogël të vënies së maskës sapo dalim nga shtëpia, të mbajtjes së maskës kudo ku jemi jashtë shtëpisë, të ruajtjes së distancës, të mos shkuarjes në restorante e klube kur nuk është e nevojshme, vërtet, të shmangies së grumbullimeve dhe të shëndetit të të tjerëve duke mos i prishur këto rregulla",
- deklaroi Rama.
PLATFORMA "AKADEMI. AL"
Kryeministri Edi Rama dhe ministrja e Arsimit, Evis Kushi, kanë prezantuar në Lezhë platformën online "Akademi. al". Kushi në fjalën e saj deklaroi se "Akademi. al" është portal i së ardhmes, ndërsa shtoi se me këtë platformë, nxënësit mund të dorëzojnë edhe detyrat e shtëpisë.
"' Akademi. al' është platformë shumë e mirë për nxënësit. Duhet që asnjë orë mësimore të mos mungojë gjatë vitit shkollor. Iu jemi mirënjohës pa fund mësuesve për kontributin e tyre. ' Akademi. al' krijon mundësinë për mësim online, shërben për nxënës nga 3 deri 18 vjeç. Me këtë platformë mund të dorëzohen online edhe detyrat e shtëpisë. ' Akademi. al' është një aset i së ardhmes, pasi digjitalizimi është e ardhmja. Më shumë digjitalizim do të thotë më shumë efikasitet", - tha Kushi. Ndërkohë, kreu i ekzekutivit tha se duhet të vijojmë të respektojmë masat për parandalimin e përhapjes së koronavirusit. "Mësuesit, drejtuesit e arsimit janë sot në frontin e parë, bashkë me mjekët, me infermierët etj. Nëse mjekët janë në vijën e parë të shëndetit, mësuesit janë në vijën
e parë që të pengojnë vazhdimin e infeksionit, për të këputur zinxhirin e infeksioneve. Të gjithë duhet të respektojmë masat ndaj koronavirusit", - bëri me dije Rama. Më herët, kreu i qeverisë kishte njoftuar prezantimin e platformës "Akademi. al" në qytetin e Lezhës.
INFEKTIMI I MËSUESVE
Pavarësisht situatës së krijuar nga COVID- 19, Ministria e Arsimit thotë se në shkollën 9- vjeçare "Emin Duraku" në kryeqytet, mësimi po vijon normalisht. Në një deklaratë për mediat, MASR sqaron se, për shkak se disa mësues kanë rezultuar me COVID- 19 dhe disa të tjerë janë karantinuar, nga ana e DPAP dhe Zyrës Arsimore Vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje. Paralelisht, thekson Ministria, procesi i dezinfektimit në këtë shkollë është kryer tri herë gjatë gjithë javës së shkuar, teksa dezinfektimi më i fundit është realizuar ditën e diel. "Në lidhje me shkollën 9- vjeçare ' Emin Duraku' në kryeqytet, dëshirojmë t'ju informojmë se mësimi në këtë shkollë po vijon normalisht. Për shkak se disa mësues kanë rezultuar me COVID- 19 dhe disa të tjerë janë karantinuar, nga ana e DPAP dhe Zyrës Arsimore Vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje. Njëkohësisht, është shtuar edhe numri i psikologëve për të qenë sa më pranë nxënësve e mësuesve me shërbimin psiko- social. Ndërkohë, procesi i dezinfektimit në këtë shkollë është kryer tri herë gjatë gjithë javës së shkuar, teksa dezinfektimi më i fundit është realizuar ditën e diel", - theksoi MASR. Njëkohësisht, vijon MASR, është shtuar edhe numri i psikologëve për të qenë sa më pranë nxënësve e mësuesve me shërbimin psiko- social.
Ministria e Arsimit siguron prindërit e të gjithë opinionin publik, se po punohet intensivisht që jo vetëm në këtë shkollë, por në të gjithë vendin, ambientet e shkollave të jenë të sigurta, me higjienizim të vazhdueshëm, me masa që respektohen e me nivel të lartë ndërgjegjësimi nga ana e nxënësve, mësuesve dhe gjithë stafit të shkollave. "Duam të sigurojmë prindërit e të gjithë opinionin publik, se ne po punojmë intensivisht që jo vetëm në këtë shkollë, por në të gjithë vendin, ambientet e shkollave tona të jenë të sigurta, me higjienizim të vazhdueshëm, me masa që respektohen e me nivel të lartë ndërgjegjësimi nga ana e nxënësve, mësuesve dhe gjithë stafit të shkollave", - nënvizoi Ministria e Arsimit. Në shkollën "Emin Duraku", infektimi i tre punonjësve dhe pesë mësuesve ka futur në izolim 29 mësues deri në pritje të tamponit.