ATP: Emrat e pronarëve që do të kompensohen, masa e shpërblimit
Kujdes, mos harroni dokumentacionin ditën që do të plotësoni kërkesën për kompensim "Procesi i pranimit të kërkesave fillon në 13 janar"
Prej datës 12 janar do të nisë pranimi i kërkesave për kompensimin e pronarëve të pasurive të paluajtshme. "Gazeta Shqiptare" zbardh sot listën me emrat e pronarëve që duhet të kompensohen si dhe masën e kompensimit. Agjencia e Trajtimit të Pronave bën me dije se procesi i pranimit të kërkesave të subjekteve përfituesve do të fillojë në datën 12.01.2021 dhe nuk do të jetë i kushtëzuar dhe i kufizuar në kohë.
"ATP fton të gjithë subjektet e interesuara, të paraqiten pranë zyrave të saj, në adresën: rruga ' Muhamet
Gjollesha', Nr. 54, Tiranë, çdo ditë nga e hëna në të premte, për plotësimin e kërkesës për kompensim dhe dorëzimin e dokumenteve përkatëse", bën me dije ATP. Subjekti kërkues ( subjekti përfitues/ trashëgimtari ligjor/ përfaqësuesi me prokurë), në momentin e plotësimit të kërkesës për kompensim, duhet të paraqesë dokumentacionin e mëposhtëm: Kërkesën për kompensimin e pronës, sipas formatit tip, që i vihet në dispozicion nga ATP; Dëshminë e trashëgimisë për të gjithë trashëgimtarët e ligjshëm të subjektit përfitues, sipas radhës së trashëgimtarëve, në përputhje me përcaktimet e Kodit Civil; Prokurën e posaçme, të nënshkruar nga të gjithë subjektet që përfitojnë kompensim, ku si tagër i nevojshëm të jetë edhe e drejta për të tërhequr vlerën financiare, në emër të tyre. ( Në rastet kur nuk është e mundur të dorëzohet prokura e posaçme, secili bashkëpronar apo një pjesë e tyre, paraqesin kërkesë individuale apo të përbashkët, për pjesën takuese në pronën që kompensohet. Në rastin e kërkesave individuale të secilit bashkëpronar apo të një pjese të tyre, për çdo kërkesë të kryer, paguhet tarifë shërbimi në vlerën 2 000 lekë, pavarësisht se i përket së njëjtës pasuri të paluajtshme); Vërtetimin origjinal të lëshuar nga një bankë e nivelit të dytë për hapjen e llogarisë bankare në emër dhe për llogari të subjektit përfitues, ku përcaktohet edhe numri i llogarisë bankare ( IBAN), ku do të transferohet vlera financiare e përfituar;
Fotokopjen e dokumentit të identifikimit; Mandatpagesën, që vërteton pagimin e tarifës së shërbimit në vlerën 2 000 lekë. Subjektet përfituese, kërkesa e të cilëve nuk është pranuar për mungesë dokumentacioni gjatë procedurave të mëparshme, kanë të drejtë të riaplikojnë. Këto subjekte nuk paguajnë tarifë shërbimi, nëse provojnë pagimin e saj gjatë aplikimit të mëparshëm.