Anëtarësimi, Xhaçka- Varhelyi: Shpresojmë që brenda vitit të miratohet korniza negociuese
Ministrja e Jashtme Olta Xhaçka priti dje ambasadorin Luigi Soreca më të cilin diskutoi për integrimin në BE. “Shkëmbim konstruktiv i pikëpamjeve mbi procesin e integrimit dhe fillimin e projektit për asistencën teknike për integrimin. Mirënjohje për ndihmën e dhënë nga Bashkimi Europian për Ministrinë për Europën dhe Punët e Jashtme dhe institucionet e tjera shqiptare, si dhe për kontributin personal të ambasadorit Soreca. Integrimi do të jetë gjithmonë objektivi ynë më i rëndësishëm strategjik. Do të angazhojmë të gjitha burimet dhe energjitë tona, për t’u përgatitur për hapjen e negociatave Shqipëri – BE”, - shprehet ministrja Xhaçka. Po dje ministrja e Jashtme Olta Xhaçka zhvilloi edhe një bisedë virtuale me Komisionerin për Fqinjësinë dhe Zgjerimin, Oliver Varhelyi. Xhaçka vlerësoi rolin e Varhelyi në dosjen e zgjerimit, si dhe në atë të ndihmës nga Komisioni Europian për përballimin e pasojave të tërmetit dhe të pasojave të pandemisë në Shqipëri gjatë 2020- ës. Ajo theksoi se Shqipëria i ka përmbushur detyrat e saj përpara Konferencës së Parë Ndërqeveritare duke informuar Komisionerin për përmbushjen e funksionalitetit të Gjykatës Kushtetuese dhe zbatimin e reformës elektorale në bazë të rekomandimeve të OSBE/ ODIHR. Ndërsa e konsideroi historik vendimin pozitiv të Këshillit të marsit 2020 për hapjen e negociatave të anëtarësimit me Shqipërinë, Olta Xhaçka kërkoi që gjatë vitit 2021, të bëhet i mundur miratimi i kornizës negociuese për Shqipërinë dhe mbajtja e Konferencës së parë Ndërqeveritare sa më parë.