Dhuna në SHBA, Kim: E drejta për protestë të mos shndërrohet në dhunë ndaj demokracisë

Ambasadorja amerikane, Yuri Kim reagoi dje për situatën kaotike të dy ditëve më parë në Uashington të Shteteve të Bashkuara, ku protestuesit hynë në ambientet e brendshme të Kongresit. Ambasadorja Kim shprehet se demokracia nuk është e lehtë dhe nuk duhet të merret si e mirëqenë. Sipas saj, liria dhe garantimi i së drejtës nuk duhet të kthehen në paligjshmëri dhe dhunë ndaj vetë demokracisë. “Shumë miq shqiptarë kanë shprehur shqetësimin për sulmin ndaj Kongresit në SHBA. Do të doja t’ju falënderoja që qëndruat në krahun tonë. Presidenti Trump e bëri të qartë se SHBA është dhe duhet të mbetet një komb i ligjit dhe i rendit, ku ata që shkelën ligjin, do të duhet ta paguajnë. Presidenti Trump e bëri gjithashtu të qartë se Kongresi certifikoi rezultatet e zgjedhjeve dhe tani është i përqendruar për të garantuar një tranzicion të qetë të pushtetit më 20 janar. Ajo që SHBA ua këshillon edhe të tjerëve, vlen edhe për ne: liria e fjalës dhe e drejta e tubimeve janë thelbësore për demokracinë. Por kjo liri dhe e drejtë nuk duhet të shndërrohet në paligjshmëri dhe dhunë ndaj vetë demokracisë, përfshirë tranzicionin paqësor të pushtetit. Demokracia nuk është e lehtë dhe nuk duhet të merret si e mirëqenë. SHBA do të dalë më e fortë ndaj kësaj sprove të demokracisë. Ata që besojnë në demokraci, duhet të riangazhohen për ta mbrojtur atë gjithmonë”, shprehet ambasadorja amerikane. Tri ditë më parë, mbështetësit e Trump hynë brenda Kongresit, duke ndërprerë procesin e certifikimit të rezultatit të zgjedhjeve presidenciale, ku fitues u shpall Joe Biden. Nga këto trazira mbetën të vdekur 5 persona.