‘ Mund të ruhen 250 mijë doza në minus 70 gradë’, Rama në depot ku mbahen vaksinat
Komentuesit denoncojnë korrupsionin në spitale, Rama: Mos i futni të gjithë në një thes “Depo moderne farmaceutike, sipas standardeve të Bashkimit Europian”
REAGIMI
Z. Rama replikoi dje me komentuesit në “FB”: “Mos dëgjo, po shiko, se me të dëgjuar bëhesh për gjynah edhe ti që dëgjon!” Ndërkohë, një tjetër qytetar i shkruan Ramës se nuk janë rimbursuar për ilaçet e COVID, madje ka paguar infermierët dhe mjekët nën dorë. “Në fakt jo, sepse unë nuk fle gjumë, po i shoh nga afër vetë të gjitha dhe që njerëzit nuk janë budallenj, kjo as nuk diskutohet. Prandaj duro të vijë 25 prilli e do t’i dëgjojmë bashkërisht çfarë mendojnë”.
Kryeministri Edi Rama ishte dje së bashku me ministren e Shëndetësisë Ogerta Manastirliu në QSUT dhe ISHP, ku po mbahen vaksinat anti- COVID. Për të shuar zërat konspirativë mbi vaksinën, kryeministri pa nga afër depot farmaceutike në Qendrën Spitalore Universitare “Nënë Tereza” dhe në Institutin e Shëndetit Publik, ku është vendosur zinxhiri ftohës për ruajtjen e vaksinës. Z. Rama theksoi se njerëzit duhet t’i shohin këto pamje, për të qenë të sigurt si ruhet vaksina, pasi ka edhe nga ata zëra që flasin për teori konspirative. “Duhet t’i shikojnë njerëzit, se ka edhe konspiracione”, - tha kreu i qeverisë. Kryeministri vlerësoi investimet e bëra dhe e krahasoi gjendjen e këtyre depove me atë të disa viteve më parë. “Praktikisht me atë depo që ishte këtu vaksinat ishin në dorë të Zotit. Kishit një magazinë kooperative që fusnit mollët, dardhat”, - u shpreh Kryeministri. Rama ndërkohë i drejtoi edhe një pyetje ministres Manastirliu: “Po mirë, një pyetjen kam unë: sikur kjo të na ndodhte kur s’kishim këto depo, ça do na ndodhte këtu?” Manastirliu vuri theksin te buxheti për këtë investim dhe theksoi se “ne nuk kemi pasur depo farmaceutike”. “Në depon moderne farmaceutike që kemi ndërtuar për spitalin, sipas standardeve të Bashkimit Europian, ku është ngritur edhe zinxhiri ftohës i vaksinave, si dhe në Institutin e Shëndetit Publik, ku ruhet aktualisht vaksina Pfizer me magazinën që gjetëm si depo kooperativash në QSUT- në e rrënuar të 7 viteve më parë, sot do ta kishim të pamundur të siguronim ruajtjen e vaksinave”, - deklaroi Edi Rama. Vaksinat e Pfizer/ BioNTech të mbërritura në Shqipëri po ruhen në Institutin e Shëndetit Publik në kushte të standardeve ultra të ftohta - 70° C deri - 80° C.
REPLIKA
Kryeministri Edi Rama iu rikthye dje replikave të drejtpërdrejta me ndjekësit e tij në rrjetet sociale. Pasi kreu i qeverisë publikoi videon nga vizita në depon e ilaçeve në QSUT, komentuesit nuk i kanë kursyer kritikat dhe akuzat në drejtim të qeverisë. Ankesat e qytetarëve vijnë pas skandalit ku një sanitare hiqej si infermiere duke i marrë para familjares së një pacienteje me COVID19, që ndërroi jetë në spital.
“Ti mund të kesh jo 1, po 10 depo të tilla, po me ato që po dëgjojmë, gjynah për familjarët dhe ata që janë shtruar”, i thotë një komentues, ndërsa Rama i kthehet: “Mos dëgjo, po shiko, se me të dëgjuar bëhesh për gjynah edhe ti që dëgjon!” Një tjetër qytetar i ankohet kryeministrit se nuk janë rimbursuar barnat për trajtimin e COVID- it, si dhe denoncoi se ka paguar nën dorë infermierët dhe mjekët. “Po ne që e kemi të provuar e të faktuar? Do kuponë tatimorë të të gjitha ilaçeve e vizitave që kemi blerë/ bërë për një person të sëmurë nga COVID- i, apo lekët dhënë mjekëve dhe infermierëve? Ti mund të thuash ç’të duash, zotëri i dashur, por ne e kemi provuar në kurriz, s’na e shet dot sapunin për djathë”. Rama i përgjigjet komentuesit me fjalët: “Ndërsa për lekët që u paske dhënë mjekëve e infermierëve nuk e di, se s’kam provë për këtë, por nuk besoj se ke paguar gjithë mjekët e infermierët e Shqipërisë, që i fyen duke i futur të tërë në një thes”.